Soltústik Qazaqstan oblysyndaǵy «QZ MEDIA PORTAL» media agenttiginiń direktory Zákirjan Mamliýtovtyń pikirinshe, Prezident Qasym-Jomart Toqaevtyń biylǵy Joldaýy halyqqa úmit syilap, olardyń bilikke degen senimin qaitarýy múmkin. Jýrnalist alǵan áserimen QazAqparat tilshisimen bólisti.
«Osy jolǵy Joldaýdy shabyttana tyńdadym. Óitkeni koronavirýs pandemiiasynan keiin eldegi kóptegen máselelerdiń beti ashyldy. Buǵan deiin aitylmai kelgen, kórsek te kórmegendei bolǵan máselelermen betpe-bet keldik. Maǵan, burynǵy sportshyǵa, aldymen Prezidenttiń kásibi sport klýbtaryn memleket esebinen qarjylandyrýdy toqtatý kerek degeni unady. Bul óte durys, olardy kommertsiialyq uiymdar ustap, mundai klýbtar ózderi qarjy tabýy qajet. Odan da qomaqty somaǵa buqaralyq, balalar sportyn damytyp, aýlalarda sport alańdaryn salǵan durys», - deidi Zákirjan Mamliýtov.
Jýrnalistiń pikirinshe, bul jolǵy Joldaý indetten keiin senimsizdik paida bolǵan halyqqa kúsh bergendei boldy. Memleket basshysy ár máselege jeke-jeke toqtap, qolaisyz jaǵdaidan shyǵý joldaryn kórsetti.
«Jinaqtaýshy zeinetaqy qorynan 30-40 jyldan keiin emes, qazirgi ýaqytta aqsha sheshýge bolatyndyǵy qýantty. Qazaqstandyqtarǵa bul aqshany belgili bir maqsatta jumsaýǵa múmkindik týyp otyr. Osy jinaǵan qarajatymyzǵa qatysty qanshama sybailas jemqorlyq daýy týǵany bárimizge belgili. Endi ol aqshany ózimiz tiisinshe jumsai alamyz. Máselen, bankke salyp, páter alýǵa bolady nemese oqýdyń aqshasyn tóleýge, emdelýge jumsaýǵa bolady. Men úshin bul óte jaqsy jańalyq», - deidi jýrnalist.
Zákirjan Mamliýtovtyń aitýynsha, eldegi bilim berý salasy sońǵy ýaqytta synnan kóz ashpai keledi.
«Prezident óz sózinde bilim berý reformasynyń jalǵasatynyn aitty. Sonyń ishinde shalǵai aýyldardy internetpen qamtý. Meniń oiymsha, qazir osy salada júrgizilip jatqan jumystar oń nátijesin beredi. Alaida qatań baqylaý qajet.
Petitsiia týraly ideia unady. Endi biz qazaqstandyqtar demokratiialyq qoǵamdastyq retinde óz pikirimizdi arnaiy qurylǵan platformalarda bildire alamyz. Eger de bir máselede pikir bildirgender sany 50-100 myńnan asyp ketip jatsa, onda bizdiń únimizge qulaq asatyn bolady», - deidi agenttik direktory.
Zákirjan Mamliýtov «Nur Otan» partiiasynyń praimerizine qatysyp, úmitker retinde tirkeýden ótti. Onyń qazirgi máslihat depýtattarynyń jumysyna kóńili tolmaidy. Qoǵam belsendisiniń sózinshe, sózden iske kóshetin ýaqyt jetti.
«Máslihat depýtattaryn kópshilik bile bermeidi. Olar qoǵamnan alshaq, ne istep jatqandary belgisiz. Sol sebepti depýtattarǵa halyq sene bermeidi. Prezident aitqandai, máslihat depýtattarynyń qatysýymen onlain jiyndar ótetin bolsa, olardy sailaýshylar tanidy, sailaýaldy ýádelerin qalai oryndap jatqanyn biletin bolady», - deidi ol.
Zákirjan Mamliýtov Joldaýda aitylǵan Úkimetke júktelgen mindetter halyqtyń ál-aýqatyn jaqsartýǵa baǵyttalǵanyn aitady.
«Jalpy, Prezidenttiń aitqandary, josparlary maǵan unady. Endi sol qoiylǵan mindetterdiń eń bolmaǵanda jartysy oryndalatyn bolsa, bizdiń ómir súrý deńgeiimiz jaqsarady. Buǵan deiin elimiz toqyraýdy bastan keshirip jatyr, esh ózgeris joq degen pikirler qalyptasty. Halyq pen bilik arasy alshaqtap ketkendei boldy. Osy Joldaý arqyly ol ara qashyqtyq qysqarady dep oilaimyn. Halyq – biliktiń qainar kózi. Osyǵan sáikes elde qandai ister qolǵa alynbasyn ol el igiligi, qarapaiym halyq úshin jasalýy tiis», - dep sózin qorytyndylady «QZ MEDIA PORTAL» media agenttiginiń direktory Zákirjan Mamliýtov.
