Memlekettik qyzmetshilerdiń eńbekaqysy keler jyldyń shildesinen bastap, faktorlyq-baldyq shkala boiynsha tólenedi.
Bul týraly QR Memlekettik qyzmet isteri agentiginiń Mańǵystaý oblysy boiynsha departamentiniń basshysy Nurgúl Jannanazarova málim etti.
Memleket basshysy biylǵy Joldaýynda jalaqy tóleýdiń jańa júiesin engizýdi tapsyrdy. Osylaisha, memlekettik qyzmetkerlerdiń jaýapkershiligi men motivatsiiasy nyǵaitylmaq. Eki jyldan beri Mańǵystaý oblysynda pilottyq joba retinde júzege asyp kele jatqan osyndai júie tiimdiligin kórsetti. Faktorlyq-baldyq shkala boiynsha eńbekaqy memlekettik qyzmetkerdiń jumysynyń kólemi men qiyndyǵyna bailanysty tólenedi. Onyń dástúrli jalaqy tóleýden artyqshylyǵy osynda.
«Faktorlyq-baldyq shkalanyń engizilýi ásirese ortalyq atqarýshy organdar men jergilikti ákimdiktegi qyzmetshiler arasyndaǵy jalaqy aiyrmashylyǵyn 70 protsentten 20 protsentke deiin qysqartty. Osy faktorlyq-baldyq shkala engizilgeli beri Mańǵystaý óńirinde memlekettik qyzmettiń imidji artty dep aitýǵa bolady. Oǵan naqty dálelderimiz de bar. Buryn bir orynǵa óte az úmitker bolatyn, qazirgi kúni ortasha alǵanda 2,5-3 adamdai bolyp tur»,-dedi Nurgúl Jannazarova.
Óńirde memlekettik qyzmetten ketetinderdiń sany 4 esege azaiǵan. Burynǵy ýaqytta jergilikti ákimdikterden óz erkimen ketetinder sany 7,5 protsent bolsa, búginde bul qyzmetke degen qyzyǵýshylyq artqan. Aýyl ákimdikterinde de maman tapshylyǵy joiyldy. Máselen, 2017 jyly 28 bos oryn bolǵan, al biyl 2-aq oryn bos tur. Sonymen qatar jeke sektordan memlekettik qyzmetke aýysýshylar da kóbeigen. 2 jyl ishinde 1200 qyzmetker jańa júiemen jalaqy alǵan. Al keler jyly 1 shildeden bastap olardyń qatary 1500-ge artpaq.
