QR Prezidenttigine kandidat Ámirjan Qosanov memlekettik tildi erkin meńgergen. Mundai qorytyndyny búgin QR Ortalyq sailaý komissiiasy janynan qurylǵan QR Prezidenttigine kandidattyń memlekettik tildi meńgerý deńgeiin anyqtaityn lingvistikalyq komissiia shyǵardy, dep habarlaidy "Ult aqparat".
"Búgin memlekettik tilden emtihan tapsyrýǵa Qosanov Ámirjan Saǵidrahmanuly keldi. Ózderińiz bilesizder, emtihan úsh kezeńnen ótedi. Jazba jumysynyń taqyryby "TMD tarihy men búgini" boldy. Sodan keiin mátin oqýǵa aqyn Qadyr Myrza Áliniń shyǵarmalaryn tańdap aldy. Úshinshi kezende "Óner bilim bar jurttar" degen taqyrypta sóz sóiledi", - dedi komissiia tóraǵasy Myrzatai Joldasbekov kandidattyń emtihan qorytyndysyn jariialai kele.
Onyń aitýynsha, prezidenttikke kandidat emtihannyń barlyq úsh kezeńinen súrinbei ótti.
"Jazba jumysyn biik deńgeide jazyp, taqyrypty tereń qamtydy. Qadyr Myrza Áli zamandasymyzdyń óleńin erkin, ádemi oqydy. Úshinshi "Óner-bilim bar jurttar" degen taqyrypta da óte ádemi áńgime órbitti. Biz qanaǵattandyq. Sonymen lingvistikalyq komissiiasynyń qorytyndysy - Qosanov Ámirjan Saǵidrahmanuly memlekettik tildi erkin meńgergen. Basqa pikir joq", - dedi M.Joldasbekov.
