Aqmola oblysynda qatty aiazdyń saldarynan isten shyqqan avtobýstarda bolǵan 150 jýyq Qyrǵyzstan men Ózbekstan Respýblikalarynyń azamattaryna kómek kórsetildi, dep habarlaidy QazAqparat tilshisi.
TDJ baspasóz qyzmetiniń deregi boiynsha, aǵymdaǵy jyldyń 24 qańtarynda saǵat 06:30 shamasynda Astrahan aýdany aýmaǵyndaǵy «Almaty-Ekaterinbýrg» tas jolynyń 114 shaqyrymynda jol ashýshylarǵa avtobýs isten shyqqany týraly aqparat túsken.
«Oqiǵa ornyna jetken qutqarýshylar men tártip saqshylary avtobýstyń Qyrǵyzstannyń Djalalabad qalasynan Máskeýge baǵyt alǵanyn anyqtady. «Mersedes sprinter» avtobýsynda 22 jolaýshy bolǵan. Olardyń barlyǵy Qyrǵyzstan Respýblikasynyń azamattary. Jolaýshylar Astrahan selosyndaǵy orta mektepke jaiǵastyrylyp, ystyq tamaq jáne jatyn orynmen qamtamasyz etildi.
Sol kúni saǵat 21:17-derde Kókshetaý qalasynyń mańynda 22 ózbekstandyq azamat otyrǵan avtobýs ta isten shyǵyp, sheteldik jolaýshylar oblys ortalyǵyndaǵy áleýmettik beiimdeý ortalyǵyna jetkizildi. Al, arada jarty saǵat ótken soń ózbekstandyqtar mingen taǵy avtobýstyń isten shyqqany anyqtaldy. Bul avtobýsta Ózbekstannyń 37 azamaty men 2 júrgizýshi bolǵan. Olar oblys ortalyǵyndaǵy «Alaman» qonaq úiine jaiǵastyryldy.
Sonymen qatar, qutqarýshylar 25 qańtarda túńgi saǵat 00:30 Qyrǵystan Respýblikasynyń 59 azamaty men 4 júrgizýshisi bolǵan jolaýshylar avtobýsyna kómek kórsetti. Olardyń barlyǵy Kókshetaý qalasynyń áleýmettik beiimdeý ortalyǵyna jetkizilip, ystyq tamaqpen qamtamasyz etildi», - dep túsindirdi baspasóz qyzmetindegiler.
