Foto: otyrar.kz
«Jolaýshylar tasymaly» AQ poiyzda jolaýshy ózin jaisyz sezingen jaǵdaida qandai áreket jasaý qajet ekenin eske salady. Barlyq jolaýshylar poiyzdarynyń jolserikteri alǵashqy meditsinalyq kómek kórsetý boiynsha arnaiy daiarlyqtan ótedi, al ár poiyz meditsinalyq qobdishamen jabdyqtalǵan. Bul týraly «Jolaýshylar tasymaly» AQ baspasóz qyzmetine silteme jasap Ult.kz habarlaidy.
Jol ústinde jolaýshynyń jaǵdaiy nasharlaǵan jaǵdaida:
1. Vagon jolserigine dereý habarlaý qajet.
Jolserik jolaýshynyń jaǵdaiyn baǵalap, óz quzyreti sheńberinde alǵashqy kómek kórsetedi.
2. Qajet bolǵan jaǵdaida jolserik poiyz bastyǵyn habardar etedi.
Poiyz bastyǵy qajetti sharalardy qabyldap, meditsinalyq qyzmettermen bailanysty qamtamasyz etedi.
3. Shuǵyl jaǵdai týyndasa, jedel járdem shaqyrylady.
Qajet bolǵan jaǵdaida poiyzdy jaqyn stantsiiada meditsina qyzmetkerleri qarsy alady nemese erekshe jaǵdailarda belgilengen tártipke sáikes jospardan tys toqtaý jasalýy múmkin.
4. Jeke dári-dármekterdi ózińizben birge alyp júrý usynylady.
Sozylmaly aýrýlary bar jolaýshylar qajetti dárilerdi aldyn ala daiyndap, yqtimal qaýipter týraly jolserikti habardar etkeni jón.
Poiyzdarda tótenshe jaǵdailar turaqty túrde oryn alyp jatady jáne olar tek jolaýshynyń densaýlyǵynyń nasharlaýymen ǵana shektelmeidi. Poiyz brigadalarynyń tájiribesinde túrli oqiǵalar kezdesedi, onyń ishinde sapar barysynda bosaný jaǵdailary da bar. Sońǵy úsh jylda Ulttyq tasymaldaýshy poiyzdarynda jolserikter men poiyz bastyqtarynyń qoldaýymen shamamen 15 sábi dúniege kelgen.
Ulttyq tasymaldaýshy jolaýshylardyń qaýipsizdigi men densaýlyǵy basty basymdyq ekenin atap ótedi.
«Jolaýshylar tasymaly» AQ jolaýshylardy óz densaýlyǵyna muqiiat qaraýǵa jáne ýaqtyly kómek suraýǵa shaqyrady.
