QR IIM Ákimshilik politsiia komiteti tóraǵasynyń orynbasary Álibek Keńispaev jol saqshylary qandai jaǵdaida kólikterdi qolmen belgi berip toqtata alatynyn túsindirdi, dep habarlaidy «QazAqparat» tilshisi.
«Ózderińiz biletindei, jol saqshylary ótken jyldan bastap avtopatrýldeý rejimine kóshken bolatyn. Demek, jol boiyndaǵy kólikterdi toqtatý avtopatrýldeý rejiminde júzege asyrylady. Biraq, avtopatrýl árdaiym qozǵalysta bolmaidy, jaiaý nariad júrip bara jatqan kólikti toqtata alady. Avtopatrýldeý baǵdary boiynsha bizde apattyq ári qaýipti ýchastoktar bar. Ol jerde jol saqshylary erejelerdi jaiaý júrip tekseredi. Eger avtopatrýl men jaiaý nariad joldyń boiynda toqtap turyp, jol erejesiniń buzylǵanyn baiqasa, onda ol kólikti toqtatyp, tiisti sharalardy qoldanady», - deidi Álibek Keńispaev OKQ-da ótken baspasóz máslihatynda.
QR IIM ókiliniń aitýyna qaraǵanda, qoldanystaǵy zań boiynsha kólik quraldaryn zańsyz toqtatýǵa bolmaidy.
«Eger kóliktiń zańsyz toqtatylǵany anyqtalsa, siz senim telefony arqyly IIB-ge shaǵym túsire alasyz. Ár jaǵdai boiynsha bizde tekserý júrgizilip, tiisti sharalar qabyldanady», - deidi ol.
