Sońǵy 5 jylda elimizde jol boiynda maldy basyp ketken 643 oqiǵa tirkeldi. Bul týraly QR Indýstriia jáne infraqurylymdyq damý ministrliginiń Avtomobil joldary komitetine qarasty «Jol aktivteri ulttyq sapa ortalyǵy» RMK bas direktory Zamir Saǵynov aitty, dep habarlaidy QazAqparat.
«Taǵy bir kókeitesti máselege nazarlaryńyzdy aýdarǵym kelip otyr. Ol – maldy basyp ketý deregi boiynsha oryn alatyn jol-kólik oqiǵalary. Bundai jaǵdailar kóbine ieleriniń qaraýsyz qaldyrylǵan úi janýarlarynyń qatysýymen oryn alady. Sońǵy 5 jylda maldy basyp ketken 643 oqiǵa tirkelgen. Mundai jaǵdailarda, júrgizýshiler materialdyq shyǵyn shegip qana qoimai, aýyr jaraqattanyp, tipti qaza bolyp jatady», - dedi ol Ortalyq kommýnikatsiialar qyzmetinde baspasóz máslihaty barysynda.
Ortalyq bas direktorynyń málimetinshe, tek ótken jyldyń ózinde respýblikalyq trassalarda osyndai 104 jol-kólik oqiǵasy oryn alyp, 140 adam jaraqattansa, 36 adam qaitys bolǵan.
«Úi janýarlaryn joldar boiynda erkin jaiýdy boldyrmaý úshin menińshe, mal ieleriniń jaýapkershiligin qataitý qajet. Sondai-aq úi janýarlary ielerin jaýapkershilikke tartý máselesin zańdyq negizde naqty tetiktermen bekitý kerek dep sanaimyn», - dedi Zamir Saǵynov.
