Jemqorlyqty joimaǵan ýniversitetter tiisti baǵyt boiynsha litsenziiasynan qaǵylýy múmkin. Bul týraly búgin QR Bilim jáne ǵylym ministri Ashat Aimaǵambetov aitty, dep habarlaidy "Ult aqparat".
«Adal bilim» aýditi ótkizilip jatyr. Osy aýditti kelesi jyldyń aqpan aiynyń sońyna deiin aiaqtaý qajet. Odan keiin tiisti jospar bekitetin bolamyz. Bul - óte mańyzdy másele. Ekinshiden, joǵary oqý ornynda jemqorlyq faktilerine jol bermeý qajet. Bul máseleni túbegeili joiýǵa bolady. Biraz ýniversitet ony búgin joidy dep aita alamyz. Jalpy, osy máseleden múldem aýlaq júrgen keibir ýniversitet bar. Demek, ýniversitettiń basshysy qalasa, mundai problemany joiýǵa bolady degen sóz. Iaǵni, bul sol oqý ornynda qabyldanǵan saiasatqa bailanysty. Eger keibir ýniversitet bul máseleni joisa, basqa ýniversitetterdiń qolynan bul áli kelmei otyrsa, onda «nege?» degen saýal paida bolady», - dedi Ashat Aimaǵambetov ministrliktiń apparat jinalysynda.
Ministr jemqorlyq faktileri anyqtalǵan ýniversitetterge qatysty usynys bolǵanyn atap ótti.
«Tiisti baǵyt boiynsha eń aldymen litsenziiany toqtatý, odan keiin taǵy da qaitalanǵan jaǵdaida litsenziiany qaitarý boiynsha normany zertteý kerek. Eger zań júzinde oryndalatyn jáne zertteý nátijesinde durys sheshim bolsa, biz mundai normany qabyldaýǵa daiynbyz. Óitkeni, joǵary oqý oryndaryndaǵy jemqorlyqty joiý kerektigi aitylǵanyna biraz ýaqyt boldy. Biraq, problema bar, ony túbegeili sheshýimiz kerek. Tiisti baǵyttaǵy litsenziiasynan aiyrý kerek bolsa, onda mundai sheshimdi de qabyldaýǵa daiynbyz», - dedi ol.
