Qazaqstan joǵarǵy sotynyń qylmystyq ister boiynsha kassatsiialyq alqasy 22 qańtarda Aqmola garnizony áskeri sotynyń 2018 jyldyń 26 qańtarynda ulttyq qaýipsizdik komitetiniń (UQK) burynǵy tóraǵasy Nartai Dútbaevqa shyǵarǵan úkimine bas prokýratýranyń qarsy shaǵymyn qarady, dep jazady Azattyq.
Joǵarǵy sot Dútbaevqa kesilgen 12 jyldyq túrme jazasyn 11 jylǵa azaitty. Bul týraly Dútbaevtyń advokaty Nyǵmet Esirgepov habarlaǵan. Advokat kassatsiialyq alqa isti jabyq qaraǵanyn, sondyqtan ózi qorǵaityn adamnyń isi jáne kassatsiialyq protsess týraly tolyq aqparat bere almaitynyn aitty.
Joǵarǵy sot baspasóz qyzmetiniń qyzmetkerleri bul is boiynsha kassatsiialyq alqa sheshimi týraly kúnniń sońyna qarai ǵana aita alýy múmkin ekenin habarlady.
Aqmola garnizonynyń áskeri soty Nartai Dútbaevty qarjy jymqyrdy jáne qarjy bopsalady degen aiyppen 12 jylǵa sottaǵan. Mundai aiyptarmen Orynbasar Qalqabaev pen Nartai Dútbaevtyń inisi Rústembek Dútbaev ta túrmege jabylǵan.
Dútbaev osyǵan deiin 2017 jyly «memlekettik qupiiany jariialaý» isi boiynsha jeti jylǵa sottalǵan. Al 2018 jyly 26 qańtarda áskeri sot Dútbaev «qarjy jymqyrý jáne jylystatý» aiyptarymen 12 jylǵa sottalǵanyn, eki jazanyń jartylai biriktirilip, sońǵy sheshim retinde 12 jyl kesilgenin habarlaǵan. Ol kezde Qalqabaev pen Rústembek Dútbaevqa jazalary biriktirilip, árqaisysyna segiz jyldan jaza kesilgen.
Nartai Dútbaev UQK-ni 2001 jylǵy jeltoqsannan 2006 jylǵy aqpannyń 22-sine deiin basqarǵan. Ol oppozitsiia jetekshisi Altynbek Sársenbaiulyn qastandyqpen óltirýge UQK-niń «Arystan» arnaiy jasaǵy qyzmetkerleriniń qatysy bary anyqtalǵannan keiin otstavkaǵa ketken. Dútbaev keiin UQK akademiiasynyń basshysy, prezident Nursultan Nazarbaevtyń keńesshisi boldy. Az ýaqyt «Qazatomónerkásibi» ulttyq kompaniiasynyń vitse-prezidenti qyzmetin atqardy. Al 2016 jyly jeltoqsanda qamaýǵa alyndy.
