Búgin Nur-sultan qalasy Baiqońyr aýdanynyń №2 soty Meiram Janǵuttinovke qatysty alaiaqtyqqa qastandyq jasaý faktisi boiynsha (QK 24-baby 3-bóligi, 190-baby 3-bóligi 1-2 tarmaǵy) jáne L. Turǵynbaevaǵa para bergeni úshin (QK 367-baby 3-bóligi 2 tarmaǵy) aiyptaý úkimin jariialady.

Elordalyq sottyń habarlaýynsha, M. Janǵuttinov jaýapty memlekettik laýazymdy atqaratyn tulǵa bola otyryp (QR Joǵarǵy sotynyń sýdiasy, búginde ókilettigi toqtatyldy), para alý jeleýimen Turǵynbaevadan (Shymkent qalasy Ál-Farabi aýdandyq sotynyń sýdiasy, ókilettigi toqtatyldy) deldal Abdýsattarov arqyly 7 myń AQSh dollary somasyndaǵy qarajatty iemdenýge tyrysty.

Joǵarǵy sottyń eks-sýdiasy M. Janǵuttinov aqsha alý kezinde ustalǵan.

«Sot jaza taǵaiyndaý kezinde Janǵuttinov pen Turǵynbaevaǵa qatysty sýdia antyn buzý aýyr jaǵdai dep tanyp, bas bostandyǵynan aiyrý jazasyn ádil jaza dep sanady. Osyǵan bailanysty Janǵuttinov 5 jylǵa bas bostandyǵynan aiyryldy. Turǵynbaevaǵa qatysty jazany jeńildetetin mán-jailar eskerildi. Iaǵni, shyn júrekten ókiný jáne qylmysty ashý men oǵan qatysy barlardy áshkereleýge belsendi yqpal etkenin eskere otyryp (QK 55-baby 4-bóligi) ol 5 jylǵa sottaldy. Sottalýshynyń ekeýi de ómir boiy memlekettik qyzmette jumys isteý quqyǵynan aiyryldy», - delingen habarlamada.

Sot úkimi zańdy kúshine engen joq.