Joǵarǵy sottyń qylmystyq ister boiynsha kassatsiialyq alqasy Vladislav Chelahtyń úkimdi qaita qaraý jáne 30 million teńge ótemaqy tóleý týraly ótinishine qatysty qaýly shyǵardy, dep habarlaiddy Sputnik Qazaqstan tilshisi.
"Sottalýshy Vladislav Chelahqa qatysty Almaty qalasynyń qylmystyq ister boiynsha aýdanaralyq áskeri sotynyń 2012 jyldyń 11 jeltoqsanyndaǵy úkimin, Áskeri sottyń qylmystyq ister boiynsha appeliatsiialyq sot alqasynyń 2013 jyldyń 6 aqpanyndaǵy qaýlysyn, Joǵarǵy Sottyń kassatsiialyq sot alqasynyń 2013 jyldyń 21 maýsymyndaǵy qaýlysy ózgerissiz qaldyrylsyn, Chelahtyń ótinishi qanaǵattandyrylmasyn", — dep oqydy sheshimdi alqa tóraǵasy Abai Rahmetýlin.
Sotqa sýdia Abai Rahmetýlin tóraǵalyq etti, sondai-aq sýdialar Aidan Nurbekov pen Larisa Shepeleva qatysty.
2017 jyly qarashada BUU komiteti Qazaqstan Chelahtyń isin qaraý kezinde halyqaralyq azamattyq jáne saiasi quqyqtar paktisin buzdy degen sheshim shyǵardy. BUU komiteti óz sheshimi týraly Qazaqstannyń Bas prokýratýrasyn habardar etti.
Bas prokýratýranyń usynysy boiynsha Chelah Joǵarǵy sotqa júgindi. Otyrysqa Chelah qatysqan joq.
2012 jyldyń 28 mamyrynda qazaq-qytai shekarasynda ornalasqan "Arqankergen" shekara beketinde qaiǵyly oqiǵa boldy. Mamyr aiynyń sońǵy kúnderinde Arqankergendegi shekarashylarmen bailanys kenetten úziledi. Eki kúnnen keiin – 30 mamyrda Arqankergenge jiberilgen jasaq shekara beketiniń túgi qalmai janyp ketkenin kóredi.
Bir kúnnen keiin Ulttyq qaýipsizdik komitetine qarasty shekara qyzmeti órtenip ketken ǵimarattan 12 adamnyń súiegi, al kelesi kúni taǵy eki shekarashynyń múrdesi tabylǵanyn málimdedi. Buǵan qosa, bir qoryqshynyń máiiti tabylǵan. 4 maýsymda shekara beketinen 24 shaqyrymda ornalasqan qystaýlardyń birinde 15-shi shekarashy Vladislav Chelah ustaldy. Ol kezde qaraǵandylyq jigit 19 jasta bolǵan.
Tergeý nusqasy boiynsha, shekara beketi jeke quramynyń qatardaǵy sarbazy bolǵan Vladislav Chelah óz qyzmettesterin atyp óltirip, qylmysyn jasyrý úshin kazarmany órtep, qoryqshynyń kózin qurtqan.
Qylmystyq ister jónindegi mamandandyrylǵan aýdanaralyq áskeri sot Chelahty 15 adamdy óltirip, memlekettik qupiiany jariia etip, taratqany úshin, sondai-aq qarý urlap, áskeri múlikti joiyp, áskerden qashqany úshin aiypty dep tanyp, ómir boiyna bas bostandyǵynan aiyrdy.
Eń alǵash ustalǵan kezde qaraǵandylyq jigit birneshe adamdy bir ózi jairatyp salǵanyn moiyndady. Biraq keiin sotta barlyǵyn joqqa shyǵardy. Ol oǵan qysym jasalǵanyn, kináni moiyndaýǵa májbúr bolǵanyn málimdedi.
