QR Joǵarǵy soty Baian Esentaevanyń burynǵy kúieýi Baqytbek Esentaevqa qatysty úkimdi qaita qaraýdan bas tartty, dep habarlaidy QazAqparat.
«QR Joǵarǵy soty sottalýshynyń advokaty men zardap shegýshi Baian Esentaevanyń ótinish haty boiynsha Baqytbek Esentaevqa qatysty úkimdi qaita qaraýdan bas tartty», - delingen elimizdiń joǵarǵy sot organynyń baspasóz qyzmeti taratqan aqparatta.
Esterińizge sala ketsek, ótken jyldyń 13 qarasha kúni Almaty oblysynyń qylmystyq ister jónindegi mamandandyrylǵan aýdanaralyq sotynda sýdia Berikjan Baijúnisov Baqytbek Esentaevqa qatysty sot úkimin jariia etti. Sýdia qatań rejimdegi koloniiada 9 jylǵa bas bostandyǵynan aiyrý týraly úkim shyǵardy. Alaida, qos tarap sot úkimimen kelispedi. Appeliatsiialyq shaǵym túsirdi. Qorǵaýshylardyń pikirinshe, Baqytbek Esentaev óziniń burynǵy áielin óltirýge oqtalmaǵan.
B. Esentaev QR QK-niń 24-bap 3-bólimi, 99-baptyń 2-bólimi 10-tarmaǵy (zorlaýmen nemese seksýaldyq sipattaǵy zorlyq-zombylyq áreketterimen ushtasqan adam óltirýge oqtalý) 120-baptyń 1-bólimi (zorlaý) 121-baptyń 1-bólimi (seksýaldyq sipattaǵy zorlyq-zombylyq áreketteri) boiynsha aiyp taǵylǵan edi.
