Foto: Flickr
Ýkraina Joǵarǵy radasynyń depýtaty Aleksei Goncharenko prezident keńsesiniń keńesshisi Aleksei Arestovichti qyzmetten alý týraly talap jazylǵan hatqa qol jinaý bastalǵanyn habarlady. Buǵan qosa ol Ýkraina qaýipsizdik qyzmetinen Arestovichtiń is-áreketinde memleketke opasyzdyq jasaý qylmysy bar-joǵyn tekserýdi talap etken, dep jazady Azattyq.
Budan bólek prezident Vladimir Zelenskiidiń ákimshiligi "Arestovichtiń soǵys taqyrybyna aitqan sózderi prezident keńsesiniń resmi pozitsiiasyna esh qatysy joq" dep resmi málimdeýi kerek dep sanaidy Goncharenko.
16 qańtarda Joǵarǵy radanyń taǵy birneshe depýtaty prezident keńsesiniń basshysy Andrei Ermaktan biliktiń resmi pozitsiiasy men Arestovichtiń ustanymyn ajyratýdy surap ótinish qylǵan. Olardyń pikirinshe, keńesshi Arestovichtiń "is-áreketi elge ziian tigizedi", mysaly, onyń Dnepr qalasyndaǵy kópqabatty úidiń qiraýynyń sebebi týraly aitqan sózin "agressor eldiń mediasy qolma qol ilip alyp, jar sala taratty" dep jazǵan olar.
14 qańtarda Feigin Live YouTube-arnasyna bergen suhbatynda Aleksei Arestovich Dnepr qalasyndaǵy kópqabatty turǵyn úidiń tutas bir podezin qiratqan reseilik zymyrandy Ýkraina kúshteriniń áýe shabýylyna qarsy júiesi atyp túsirgen dep málimdedi. Ýkraina qorǵanys ministrligi muny joqqa shyǵaryp, Resei zymyrany kózdep atqan nysanaǵa dál tigen dep aitty.
Keiinirek Arestovich áýeli "efirde sharshap otyryp aitqan" sózi úshin keshirim surap, biraq artynan ainyp qaldy. Prezident keńsesi keńesshisiniń sózi Ýkrainada daý týǵyzdy. Dnepr qalasynyń meri Boris Filatov Arestovichti "menmensigen", "irigen aýzynan shirigen sóz shyǵady" dep sókti.
Aita keteiik, byltyr 24 aqpanda Resei Ýkrainaǵa qarsy basqynshylyq soǵys ashqannan keiin Aleksei Arestovich prezident Zelenskii keńsesiniń negizgi spikerleriniń birine ainalǵan. Arestovichtiń soǵystyń barysy jaily aitqan efirleri milliondap qaralady.
Ýkrainanyń sotsiologiia qyzmetteri júrgizgen zertteý derekteri boiynsha, Arestovich eldegi eń tanymal saiasatkerler men qoǵam qairatkerleriniń úshtigine enedi: ol prezident Vladimir Zelenskii men áskerbasy Valerii Zalýjnyidan keiin úshinshi orynda tur. Byltyr tamyzda Arestovich kelesi prezident sailaýyna túsýi múmkin ekenin málimdegen.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
