Qostanai oblysy mamandandyrylǵan aýdanaralyq qylmystyq sotynyń úkimimen asa aýyr qylmys jasaǵan Jitiqara qalasynyń úsh turǵyny sottaldy. Onyń biri ómir boiyna bas bostandyǵynan aiyryldy, dep habarlaidy "Ult aqparat" oblystyq sottyń baspasóz qyzmetine silteme jasap.
2019 jyldyń jazynda sottalýshy Ch. Reseiden Jitiqaraǵa kelip, buzaqylyq, tonaý jáne jymqyrý sekildi qylmystardy jasaýmen ainalysqan. Ol óziniń qylmystyq áreketine 14 jasar eki bozbalany tartqan. Onyń bireýi - Ch-nyń týysy.
Olardyń dostyǵy asa aýyr qylmyspen aiaqtaldy. Úsheýi eki adamdy óltirip, aldyn ala oilastyrmai taǵy bir adamdy ańdaýsyzda óltirip qoiǵan.
Birinshi jaǵdaida Ch. ózi ǵana óltirse, ekinshi qylmys kezinde ol bárin uiymdastyryp otyrdy. Iaǵni L. atty jasóspirimdi mas qylyp, qolyna pyshaq bergen de, aldynda uryp-soǵyp esinen tandyrǵan adamdy óltir dep tapsyrǵan.
Marqumdardyń bári - turǵylyqty úi-jaiy joq qańǵybastar bolatyn.
Aita ketý kerek, Ch. Resei Federatsiiasynda birneshe ret sottalǵan. Ol adamdy aýyr jaraqattap, ólimge jetkizý, jasóspirimderdi qylmysqa tartý sekildi aiyppen túrmede otyryp shyqqan.
Sottalýshylardyń kinási ózderiniń sózimen, jábirlenýshiler jáne kýágerlerdiń bergen túsiniktemesimen, saraptama qorytyndysymen tolyq dáleldendi. Degenmen, Ch. óz kinásin moiyndaǵan joq.
Sot Ch-ny ómir boiyna bas bostandyǵynan aiyrdy.
Al jasóspirim L. kinásin tolyq moiyndap, istegen isine ókinetinin jetkizdi, qylmysty ashýǵa kómektesti, kisi óltirýge 14 jasynda, úlken adamnyń májbúrleýimen barǵanyn aitty. Sot osynyń bárin eskere otyryp, ony 7 jylǵa sottady.
Al K. atty ekinshi bozbalaǵa 3 jylǵa bas bostandyǵyn shekteý jazasy berildi.
Úkim zańdy kúshine engen joq.
