Búgin Qazaqstan Respýblikasynyń Prezidenttigine kandidat Jigýli Dairabaev Mańǵystaý oblysyna keldi. Eń aldymen kandidat Munaily aýdanynda ornalasqan «Saýqymbek» un tartý zaýytynyń ujymymen kezdesti. Birneshe jyl buryn iske qosylǵan óndiris oshaǵy joǵary surypty un óndirip, 70-ke jýyq adamdy turaqty jumyspen qamtamasyz etip otyr.
Zaýyt aldaǵy ýaqytta daiyn ónimdi eksporttaýǵa nietti. Alaida, kei kezde kásiporynǵa bidai jetkizkýde qiyndyqtar týyndaidy, vagondar tapshylyǵy baiqalady.
«Qazaqstandaǵy agrarlyq sektordyń negizgi bir salasy egin sharýashylyǵy ekeni belgili. Elimizdiń soltústik, ortalyq óńirlerindegi alqaptar tutastai respýblikany astyqpen qamtamasyz etýge, tipti, dándi daqyldardy shet elderge eksporttaýǵa múmkindik berýde. Degenmen el ishinde týyndaǵan osyndai problemalar kásipkerlerdiń jumysyna keri áser etýde. Meniń árdaiym aitatynym, adal eńbek etip, halyqty sapaly ári qoljetimdi azyq-túlikpen qamatamasyz etetin azamattarymyzǵa qoldaý kórsetýimiz qajet. Qazaqstanda taýarlar qoryn qurý strategiiasynda azyq-túlik naryǵyn damytý jáne qaýipsizdigin saqtaý bárinen buryn importqa táýeldi emes, otandyq óndiris esebinen júzege asýy kerek», – deidi Jigýli Dairabaev.
Un tartý zaýytynan keiin kandidat mal bordaqylaý keshenine bardy. Qazirgi ýaqytta elimizde mal sharýashylyǵyn damytýǵa erekshe kóńil bólinip otyr. Osy baǵytta jumys isteitin bul keshen Aqtaý qalasynyń turǵyndaryn sapaly etpen qamtamasyz etýde. Alaida munda sý máselesi áli sheshilmei otyr, zaýyt sýdy satyp alýǵa májbúr.
«Cý máselesi búginde álemniń kóptegen elderin tolǵandyryp otyrǵany belgili. Mamandardyń boljamy boiynsha, sý memleketaralyq, elaralyq mańyzdy másele retinde aldaǵy ýaqytta da óziniń ózektiligin joimaidy. Óitkeni sý – tirshilik kózi. Sondyqtan bul máseleni memlekettik deńgeide sheshýdi qolǵa alǵanda ǵana nátijeli jumys júrip, óńirdi sýmen qamti alamyz», – degen pikirde kandidat.
Sonymen qatar Jigýli Dairabaev Munaily aýylynyń turǵyndarymen kezdesti. Kezdesý barysynda jem-shóp daiyndaý máselesine erekshe nazar aýdaryldy. Ótken jylmen salystyrǵanda, biyl bul baǵyt oń nátije berip otyr deidi sharýa ieleri. Osy rette kandidat, túitkildi máselelerdiń aldyn alý úshin tamshylatyp sýarý ádisin damytý qajet deidi. Aýyl sharýashylyǵy salasynda zamanaýi tehnologiialar men jabdyqtardy qoldaný óndiris ónimdiligin arttyrmaq.
