Foto: t.me/mazhilis_kz
Májilistegi «Aýyl» partiiasy fraktsiiasy depýtat Jigýli Dairabaev mandatyn tapsyrmaitynyn málimdedi, dep habarlaidy QazAqparat.
Búgin Májiliste tilshiler «Aýyl» partiiasy fraktsiiasynyń jetekshisi, depýtat Anas Baqqojaevtan partiia múshesi Jigýli Dairabaevtyń isti bolǵan uldaryna qatysty suraq qoidy.
«Atalǵan oqiǵadan keiin depýtat Jigýli Dairabaev mandatyn tapsyra ma?» dep surady jýrnalister.
Óz kezeginde Baqqojaev fraktsiia múshesi Dairabaev depýtattyq mandatyn tapsyrmaitynyn aitty.
«Ol depýtattyq mandatyn tapsyrmaidy. Osy oraida fraktsiianyń málimdemesin aityp otyrmyn. Biz oǵan eshqandai min taǵa almaimyz. Birinshiden, onyń jeke basyna qatysty atalǵan iste eshteńe aitylmaǵan. Ekinshiden, onyń balalary eresek azamattar. Olar óz isine ózderi jaýap berýi kerek. Olar aýyl sharýashylyǵymen birazdan beri ainalysyp kele jatyr. Táýekeldiń baryn biledi. Ózderin qorǵap, ózderi jaýapty bolýy kerek», - dedi Májilistegi «Aýyl» partiiasy fraktsiiasynyń jetekshisi.
Budan buryn habarlanǵandai, keshe Taraz qalasynyń №2 soty alaiaqtyq jasady jáne iri mólsherde aqsha jymqyrdy dep aiyptap, úkim shyǵarǵan eki kúdiktiniń Májilis depýtaty Jigýli Dairabaevtyń uldary (Didar Moldaqalyq pen Marat Dairabaev - red.) ekeni belgili boldy.
Jambyl oblystyq aýyl sharýashylyǵy basqarmasy basshysynyń ósimdik sharýashylyǵy máseleleri jónindegi orynbasary Erlan Qulkeev, kásipkerler Eljan Elibai, Didar Moldaqalyq jáne Marat Dairabaev sýbsidiia qaǵidalaryn buza otyryp, «Albion» qulpynai kóshetterine memleketten sýbsidiia alǵan.
Onyń bir bóligi alaiaqtyq jolmen urlanyp, jeke qajettiligine jumsalǵan. Memleketke 550 849 430 teńge kóleminde zalal keldi.
