Qyzylorda qalasyndaǵy A.Toqmaǵanbetov mádeniet úiinde múmkindigi shekteýli jandar arasynda dástúrli ótkizilip kele jatqan «Júrek jylýy» óner festivaliniń qorytyndy kontserti biyl 8-shi ret sahna shymyldyǵyn ashty.
Oblys ákimi Qyrymbek Kósherbaev festivalǵa qatysýshylardy quttyqtap sóz sóiledi.
– Búgingi tańda Qyzylorda oblysynda 29 myńnan astam múmkindigi shekteýli jan bar. 2013 jyly oblysymyz respýblikada birinshi bolyp múgedekter quqyǵyn qorǵaýǵa jáne ómir súrý sapasyn jaqsartýǵa arnalǵan «Jol kartasyn» jasap shyǵardy.
Múgedekterdi ońaltý baǵdarlamalarynyń oryndalýyna oblystyq biýdjetten ótken jyly 415 mln teńgege jýyq qarajat bólinip, 12 myńǵa jýyq ońaltý baǵdarlamasy oryndaldy. Múgedekterdiń shipajailarda emdelýine 1275 joldama qarastyrylyp, 3 myńnan astam múmkindigi shekteýli jan qozǵalysqa qajet quraldarmen qamtamasyz etildi.
Elbasy óziniń dástúrli Joldaýynda «Múmkindigi shekteýli adamdar úshin Qazaqstan kedergisiz aimaqqa ainalýy tiis» dep atap kórsetken bolatyn. Erekshe jandardyń rýhani damýyna, olardyń boiyndaǵy qabiletin, ónerin el aldynda nasihattaý maqsatynda oblysymyzda jyl saiyn dástúrli túrde «Júrek jylýy» óner festivali uiymdastyrylyp otyr.
Balǵyndardyń qabiletin jan-jaqty damytyp, boidaǵy ónerin qoldaýǵa baǵyttalǵan bul joba jas talanttardyń jarqyrai túsýine úlken múmkindik berýde. Syr eliniń birtýar perzenti, qalamsaptyń qudiretimen Alash balasyn tánti etken qaisar aqyn Zeinolla Shúkirovti maqtan etsek, qiyndyqtyń qatparyna qaiyspai, janyna jyryn qýat qylǵan, ómirge qushtar aqyn Nurmuhammed Ábilqasymovty búgingi kúni úlgi tutýymyz kerek.
Mundai festival-konkýrstar óńirimizdegi múmkindigi shekteýli balalar men jasóspirimderdiń, jastardyń ómirge degen qushtarlyǵyn oiatýǵa, boiyndaǵy tabiǵat bergen shyǵarmashylyq ónerlerin ashyp tanytýǵa úlken septigin tigizeri anyq, – dedi oblys ákimi.
Sondai-aq, aimaq basshysy aldaǵy jyldary festival aiasy keńeiip, oǵan bólinetin qarjy kóleminiń 3 esege ósetinin aitty. Qamqorlyq pen qoldaýǵa muqtaj festival qatysýshylary – shielilik qolóner sheberi Dilfrýz Hamitqyzyna jáne otbasyly ónerpazdar Qali Dáýrenbekov pen Aigerim Orazbaevaǵa 150 myń teńgeniń sertifikatyn tapsyrdy.
Álemge kún jylýy qandai qajet bolsa, adamǵa júrek jylýy sondai qajet. Adam qashan da adamdyq qasietterge muqtaj. Ásirese múmkindigi shekteýli jandardyń ár qadamynan meiirimdilik kútetini shyn. Bul jaiynda atalarymyz «jetim kórseń, jebei júr», «az qaiyrymdylyq jasaýdan uialma, qur qol qaitarý odan da uiat», «bergenniń berekesi bar» degen siiaqty sanaly sózder qaldyrǵan. «At jaqsysyn maqta, adam jaqsysyn jaqta» demekshi, osy baǵytta aramyzda muqtaj jandarǵa júrek jylýyn aiamai júrgen mekemeler de, adamdar da barshylyq. Solardyń biri osy festivaldi uiymdastyrǵan oblystyq mádeniet, arhivter jáne qujattama basqarmasy óner merekesiniń ótýine erekshe kúsh saldy. Ásem bezendirilgen sahnada zaǵiptar qoǵamynyń, arnaýly áleýmettik qyzmet kórsetý balalar ortalyǵynyń, múgedekterge arnalǵan ońaltý ortalyǵynyń balalary án salyp, bi biledi. Kópshilikti ym-ishara tilinde án oryndaǵan №6 estý qabileti buzylǵan balalardyń arnaiy túzetý mektep-internaty oqýshylarynyń óneri erekshe tamsandyrdy.
Kórermen ómiri de, óneri de ózgeshe jas óskinge erekshe qurmet tanytty.
