Qaraǵandy oblysy Jezqazǵan qalasynyń basshylyǵy qala aýmaǵyndaǵy mekeme, uiymdarǵa Jańa jylǵa daiyndyq sharalaryn el Táýelsizdiginiń 25 jyldyq mereitoiy atalyp ótkennen keiin bastaý týraly usynys tastady, - dep habarlaidy qala ákimdiginiń baspasóz qyzmeti.
Táýelsizdiktiń 25 jyldyǵyn laiyqty atap ótý úshin qala ákimdigi arnaiy is-sharalar josparyn ázirlegen. Osy josparda belgilengen sharalar ótpeiinshe qala aýmaǵynda jańa jylǵa daiyndyq sharalaryn bastamaý týraly ortaq sheshim qabyldanypty.
«Memleket basshysynyń «Qazaqstan Respýblikasy Táýelsizdiginiń 25 jyldyǵyn merekeleý týraly» 2016 jylǵy 28 naýryzdaǵy Jarlyǵyna sáikes egemendik mereitoiyn laiyqty atap ótý jónindegi keshendi sharalar jospary ázirlendi. Jyl boiy Táýelsizdiktiń 25 jyldyǵyna arnalǵan is-sharalar ótip keledi. Prezident Jarlyǵymen bekitilgen «Birlik pen Jasampazdyqtyń 25 jyly» tujyrymdamasy boiynsha mereitoi qarsańynda repýblika aýmaǵynda «Uly Dala Eli – Táýelsizdiktiń 25 negizi» ataýymen negizgi merekelik oqiǵalar kúntizbesi júzege asady. Qala ákimi osyǵan orai «Qazaqstan Respýblikasy Táýelsizdiginiń 25 jyldyǵyna 25 juldyzdy kún» merekelik sharalar josparyn bekitti. Ol qujat boiynsha joǵaryda atalǵan tujyrymdamaǵa sai 21 qarasha men 15 jeltoqsan aralyǵynda birqatar aýqymdy sharalar ótedi», - deidi qala ákiminiń orynbasary Zina Aqylbekova.
Ákim orynbasarynyń aitýynsha, bul kúnderi elimizdiń egemendik jyldary jetken jetistikterin nasihattaý, memlekettik rámizderge qurmetpen qaraýǵa baǵyttalǵan patriottyq, kópshilik sharalardan bólek, birneshe óndiris, kásipkerlik nysany ashylyp, iske qosylmaq.
Jezqazǵan ákimdigi el Táýelsizdiginiń 25 jyldyǵyn laiyqty atap ótý úshin óńirdegi mekeme, uiymdarǵa jańa jylǵa daiyndyq sharalaryn 18 jeltoqsannan keiin bastaý týraly usynys jasaǵan. Ákimdik usynysyn qala kásipkerleri, túrli kásiporyn, mekeme basshylary qoldap, Táýelsizdik toiynyń shyrqyn ketirmeýge ýaǵdalasypty.
"Ult aqparat"
