Jezqazǵan qalasyndaǵy 6505 áskeri bóliminiń oqý poligonynda jaýyngerlik oqý-jattyǵý kezinde bir áskeri qyzmetshi jeńil jaraqat aldy.
Foto: Kazinform
Oqiǵa 12 qyrkúiekte jaýyngerlik daiyndyq kezinde bolǵan. Oqý-jattyǵý alańynda Ulttyq ulan áskeri bóliminiń jaýyngerleri atys jattyǵýyn ótkizgen.
«Qaýipsizdik sharalaryn buzý saldarynan ofitser aiaǵynan jeńil janama jaraqat alǵan. Oǵan sol jerde barlyq qajetti meditsinalyq kómek kórsetildi. Onyń jaǵdaiy birqalypty dep baǵalandy, ómirlik mańyzdy aǵzalary zaqymdanbaǵan», — dep habarlady Ulttyq ulannyń «Ortalyq» óńirlik qolbasshylyǵynyń baspasóz qyzmeti.
Qazirgi ýaqytta oqiǵanyń sebepteri men mán-jaiy anyqtalyp, qyzmettik tergeý júrip jatyr.
Eske sala keteiik, munyń aldynda Aqtaýda áskeri qyzmetshi abaisyzda tigen oqtan kóz jumǵan edi.
