Qazaqstandaǵy Samara – Shymkent respýblikalyq tas jolynda avtobýs pen júk kóligi bir-birimen soqtyǵysyp qaldy, dep habarlaidy «Qazavtojol» ulttyq kompaniiasynyń baspasóz qyzmeti.
Aldyn ala málimetke sáikes, Neoplan markaly avtobýs júrgizýshisi Daf markaly júk mashinasymen soqtyǵysyp qalǵan.
Jol apaty búgin, 2 jeltoqsan kúni Qyzylorda oblysy Shijaǵa aýylynyń mańynda boldy.
«72 adam – Ózbekstan men Tájikstan azamattary evakýatsiialandy. Olarǵa barlyq qajetti kómek kórsetildi. Jedel járdem dárigerleri eki zardap shekken azamatty Aral aýdandyq ortalyq aýrýhanaǵa alyp ketti. Boljam boiynsha, olardyń aiaqtary synǵan. Aldyn ala aqparatqa sai, japa shekkenderdiń ekeýi de – avtobýs júrgizýshisi», – dep habarlady «Qazavtojol» baspasóz qyzmetiniń basshysy Marjan Ordabai.
Onyń aitýynsha, júk kóligin tizgindegen Ózbekstan azamaty zardap shekpegen. Qazir jol apatynyń mán-jaiy anyqtalyp jatyr.
