Almaty oblysynda jyl basynda eriktilerdiń sany 1043 bolsa, qazir olardyń sany 2033-ke jetken. Olar kómekke muqtaj jandarǵa járdem kórsetýmen ainalysyp, dezinfektsiialyq jumystarǵa atsalysýda, sol siiaqty qaýyrt jeli bailanys telefonynda jumys isteidi. Óńir eriktileriniń atsalysýymen 50 myń meditsinalyq maska tigilip, taratyldy. Áleýmettik jaǵdaiy tómen, az qamtylǵan jáne kóp balaly otbasylar men jalǵyzbasty analarǵa, jalpy 10 myń otbasyna áleýmettik kómek kórsetilip, azyq-túlikpen qamtamasyz etildi. Sol siiaqty volonterlar jalǵyzbasty qariialardyń úilerine tazalyq jumystaryn júrgizedi. Osyndai jumystardy belsene atqaryp júrgen «Jetisý eriktileri» uiymynyń múshesi, oblystyq «Meiirimdi Jetisý» front-keńsesiniń úilestirýshisi Jansaia Smaǵulovaǵa oblys ákimi Amandyq Batalov Prezidenttiń Alǵys hatyn tapsyrdy.
Quttyqtaý barysynda oblys basshysy Jansaianyń tótenshe jaǵdai kezinde ujymdyq eriktilikti uiymdastyrýdaǵy, muqtaj jandarǵa qol ushyn sozý jumystaryn úilestirýdegi, volonterlardyń atqarǵan isterin BAQ-ta nasihattaýdaǵy úlesin atap ótip, Prezidenttiń Alǵys hatyn jáne syi retinde óziniń qoltańbasy bar kitap tabystady.
- Meiirimdilik álemdi qutqarady degen sóz beker aitylmaǵan. Qaitarymyn suramai, shyn nietpen jasalǵan jaqsylyq qashanda adamnyń aldynan shyǵady. Sondyqtan jaqsylyq jasaý kez kelgen adamnyń ómirlik maqsaty bolýy tiis. Elimiz úshin osy bir qiyn-qystaý kezeńde volonterlardyń, sonyń ishinde ózińniń atqarǵan izgi isterińniń halyqqa kóp paidasy tidi, - dei kele Amandyq Batalov óziniń ómirlik tájiribesinen mysaldar aitty. Sol siiaqty Jansaianyń bolashaqtaǵy josparlary týraly surady.
Atap ótsek, Jansaia Smaǵulova I. Jansúgirov atyndaǵy Jetisý memlekettik ýniversitetiniń «Jýrnalistika» bólimin bitirgen. Búginde «Jetisý eriktileri» uiymynyń múshesi, oblystyq «Meiirimdi Jetisý» front-keńsesiniń úilestirýshisi. Alda jýrnalistik joldy jalǵastyrý da oiynda bar.
Óz kezeginde J. Smaǵulova oblys ákimine ózin jyly qabyldaǵany úshin alǵysyn aitty.
- Bul marapat maǵan ǵana emes, barlyq jetisýlyq eriktilerge berilgen marapat dep dep bilemin. Biz birligimizben ǵana kúshtimiz. Men jalǵyz ózim eshteńe tyndyra almas edim, sondyqtan bul - ortaq jeńis. Búgingi Alǵys hat budan bylaiǵy jumysymyzǵa úlken serpin beredi. Prezidentimizge volonterlardy nazardan tys qaldyrmaǵanyna rizashylyǵymyzy bildiremiz. Bul jumystardy biz óz atymyzdy shyǵarý úshin emes, júrek qalaýymen jasap júrmiz. Biz úshin eń úlken marapat – halyqtyń alǵysy, - dedi ol.
Jalpy, búgingi kúni oblysta 2033 erikti jas tirkelgen. Olar azamattardy volonterlikke tartý, kómekke muqtaj jandarǵa áleýmettik kómek kórsetý maqsatynda jumys atqarýda. Sondai-aq tótenshe jaǵdailarǵa bailanysty 404-404 qaýyrt jeli bailanys telefony qyzmet isteidi. Táýlik boiy óz jumysyn jalǵastyratyn jedel jeli tutqasynda halyqqa birinshi kezekte kómegi qajet mamandar, atap aitar bolsaq, densaýlyq saqtaý salasynyń mamandary, jumyspen qamtý jáne áleýmettik baǵdarlamalar boiynsha arnaiy mamandar, bilim basqarmasynyń mamandary men eriktiler qyzmetin uiymdastyrýshy jastar otyrady. Búgingi kúni qaýyrt jeli arqyly bailanysqan oblys turǵyndarynyń sany - 4736 adam.
Sol siiaqty dezinfektsiialyq jumystarǵa atsalysý, azyq-túlik tasymaldaý, meditsinalyq jeke qorǵanys quraldarymen qamtamasyz etýmen ainalysyp keledi.
