Foto: Polisia.kz
Jetisý oblysynda aýyr júk kólikterin tonaǵan 6 adamnan quralǵan qylmystyq top ustaldy, – dep habarlaidy Polisia.kz.
Uiymdasqan qylmysqa qarsy kúres basqarmasy Jetisý oblysy prokýratýrasynyń úilestirýimen, Jetisý óńiri arqyly Almaty – Óskemen tas joly arqyly tranzitpen ketip bara jatqan aýyr júk kólikterinen múlikti urlaýmen ainalysqan qylmyskerlerdi anyqtaý boiynsha jedel-izdestirý is-sharalaryn júrgizgen.
10 shildede uzaq jáne úilesimdi jumystyń nátijesinde alty adamnan turatyn top ustaldy, olar júieli túrde iri partiialy júk kólikterden túrli taýarlardy urlaǵan.
Bul toptyń jumysy urlanǵan múlikti satýǵa deiin jaqsy uiymdastyrylǵan.
"Qylmyskerlerdiń bir shema boiynsha áreket etkeni anyqtaldy: olar túnde tas jolǵa shyǵyp, fýranyń artynda júrip kele jatyp, trassada júk kóligi jyldamdyǵyn báseńdetetin jáne teńselmei júretin jerlerdi tańdamaq bolǵan. Óz kólikteriniń shamdaryn aldyn ala sóndirip, kóliktiń shaǵylystyratyn elementterin japsyryp qoiýǵa tyrysqan. Qaraqshylar aýyr júkke jaqyndap, onymen túiisý kezinde ilgegi bar arnaiy jasalǵan baspaldaqtyń kómegimen júk kóliginiń tóbesine kóterilgen. Ekeýi júk kóliginiń tóbesine shyǵyp, tenttiń joǵarǵy bóligin kesip, bireýi fýranyń ishine kirip, ekinshisine taýardy berip otyrady. Onyń barlyǵy jol jiegine laqtyrylǵan. Biraz ýaqyttan keiin, sybailastary GAZel avtokóligimen taýarlardy jinaýǵa kirisken. Urlanǵan zattardy satýǵa Almaty qalasyndaǵy tanystary kómektesken. Qazirgi ýaqytta birneshe adamnyń bul qylmysqa qatysy bar-joǵy tekserilip jatyr", – deidi Jetisý oblysy PD bastyǵynyń orynbasary Ábdikenov.
Foto: Polisia.kz
Olardy ustaý kezinde Jetisý oblysynyń, Almaty oblysynyń jáne Almaty qalasynyń aýmaǵynda 30-dan astam tintý is-sharasy ótkizilgen.
Sotqa deiingi tergep-tekserý QR QK-niń 188-baby 4-bóligi (Qylmystyq top jasaǵan urlyq) boiynsha júrgizilip jatyr. Qazirgi ýaqytta kúdiktiler qamaýǵa alyndy.
Politseiler basqa zardap shekken adamdardy anyqtaý jáne ustalǵandardyń uqsas qylmystarǵa qatysy bar-joǵyn tekserý jumystaryn jalǵastyryp jatyr.
