Foto: Pexels.com
Jetisý oblysynda áskeri bólimge tiesili temirjol infraqurylymy nysany memleket menshigine qaitaryldy, dep habarlaidy Ult.kz.
Áskeri prokýrorlar áskeri múliktiń maqsatty ári zańdy paidalanylýyn baqylaý jumystary barysynda birqatar zańbuzýshylyqtardy anyqtaǵan. Saryózek garnizonynyń áskeri prokýratýrasy júrgizgen taldaý nátijesinde jer komissiiasynyń sheshimi men jergilikti atqarýshy organmen jasalǵan satyp alý-satý sharty negizinde áskeri bólimniń temirjolǵa baratyn tarmaǵynyń bir bóligi kommertsiialyq kásiporynǵa zańsyz berilgeni belgili boldy.
Anyqtalǵan fakti boiynsha áskeri bólim Jetisý oblysynyń mamandandyrylǵan aýdanaralyq ákimshilik sotyna talap aryz berdi. Sot áskeri prokýratýranyń ustanymyn qoldap, sheshim men shartty zańsyz dep tanydy. Nátijesinde quny 75 mln teńgeden asatyn kirme jol qaitadan Qorǵanys ministrliginiń menshigine qaitaryldy.
Áskeri prokýratýra organdary áskeri nysandardyń saqtalýy men olardyń maqsatty paidalanylýyn qamtamasyz etý baǵytyndaǵy jumystardy jalǵastyra beretinin málimdedi.
