Jetisý oblysynda er adam órtenip jatqan úiden úsh balany alyp shyqqan, - dep habarlaidy Tengrinews.kz agenttigi.
Oblystyq Tótenshe jaǵdailar departamenti málimetinshe, 7 jeltoqsanda saǵat 21:40-ta Panfilov aýdany, Úlken aýylynda turǵyn úi órtengen. Saǵat 22:22-de 50 sharshy metr aýmaqta órt sóndirildi.
Bul rette órtti kórip, ol týraly habarlaǵan er adam órtsóndirýshiler kelgenge deiin janyp jatqan úiden 2010, 2014 jáne 2018 jyly týǵan úsh balany shyǵarǵan. Sol úide uiyqtap jatqan eresekterge kómektesip, úiden eki gaz ballonyn shyǵaryp, óz betimen órtti sóndirýge kirisken.
Balalardy qutqarǵan qaharman qyzmetten bos ýaqytynda úide bolǵan Jarkent qalasy PCh-11 órtsóndirýshisi, azamattyq qorǵaý kishi serjanty Aitbaev Erkebulan Turǵanuly bolyp shyqty. Órttiń aldyn ala sebebi - qatty otynmen jumys isteitin peshti paidalaný kezinde órt qaýipsizdigi erejelerin saqtamaý.
