Jetisý oblysyndaǵy Alakólge aparatyn Úsharal-Dostyq tas jolynan 677 synama alyndy. Degenmen onyń 160-y talapqa sai bolmai shyqty. Tórt jylda áreń aiaqtalǵan jol qurylysyna 60 milliardtan astam teńge jumsalǵan eken, dep habarlaidy "Ult aqparat" KTK arnasyna silteme jasap.
Mamandardyń sózinshe, bul jolǵa qaraǵanda 160 milliard teńge bólinip, áli de qurylys jumystary júrip jatqan Taldyqorǵan men Óskemen arasyndaǵy kúre joldyń synamasy áldeqaida jaqsy.
Úsharal-Dostyq tas joly jurtshylyqtyń Alakólge emin-erkin jetýi úshin 60 milliardtan astam teńgege salynǵan.
"380 million teńge, bir shaqyrymyna ortasha eseppen. Ol kópir Úsharal - Dostyq avtojolynyń qaita qurýda salynǵan kópir. Burynǵy eski kópirden bir shaqyrym solǵa qarai alyp, jel baǵytyn eseptei otyryp salynǵan "roza vetrov" dep atalyp ketken kópir", – dedi "QazAvtoJol" UK Jetisý oblysy filialynyń direktory Nurhat Aqyltaev.
Jol sapasyn tekseretin mamandar bul joldan synama alyp 160-ynyń talapqa sai emesin anyqtapty. Osydan keiin merdigerler kemshiligin moiyndap, olqylyqty tez rettegen. Dál osyndai zertteý bir shaqyrymy 500 million teńgege salynyp jatqan Taldyqorǵan men Óskemen arasyndaǵy kúre jolda da júrgizilgen.
"Alynǵan synamalar mindetti túrde eshkim bilmeitindei qylyp, shtrih-kod paida bolady. Ol arqyly tek zertteýden ótip bolǵannan keiin anyqtalady. Qai jerden, qai merdigerden alynǵany, sondai tártipte. Ekinshiden, zerthanalarymyzda tsifrlandyrý júrip jatyr", – dedi "Jol aktivteriniń ulttyq sapa ortalyǵy" RMK bas direktory Bolatbek Aitbaev.
Sheneýnikterdiń aitýynsha, biyl joldaǵy oiyq-shuńqyrdy retteýge 500 milliard teńge bólingen. Biraq munyń ózin azsynyp, halyqaralyq institýttardan kómek suraǵan eken.
"Josparǵa sáikes jol jóndelýine bailanysty qarjy ózgertilip otyrady. Respýblikalyq biýdjette qarjy tapshylyǵy bar. Sol sebepten de halyqaralyq qarjy institýttarynan qarjy tartyp, osy jobalardy júzege asyryp jatyrmyz", – dedi Kólik ministrligi avtomobil joldary komitetiniń basqarma basshysy Nurtilek Hasanov.
Elimizde 95 myń shaqyrym jol bar. Onyń 12 myńy jóndeýden ótýi tiis. Jol jóndeýshiler elimizdegi joldy 100 paiyz sapaly etý úshin qarajattan bólek, mamandar da jetkiliksiz deidi.
