Almaty oblysy boks federatsiiasynyń jańa prezidenti sailandy. Kezekti basshyny sailaý rásimi Almaty qalasyndaǵy oblys ákimdigi ókildiginiń májilis zalynda ótti. Osyǵan orai, aimaqtyń boks federatsiiasyn 2009 jyldan beri basqaryp kelgen Baýyrjan Ospanov óz erkimen qyzmetinen ketti.
Jiynda aldymen Baýyrjan Ospanovtyń osy aralyqta atqarǵan eńbegi saralandy. Sharany júrgizip otyrǵan Qazaqstan boks federatsiiasynyń bas zańgeri Arsen Tóleýov Baýyrjan Keńesbekulynyń eńbegine toqtala otyryp, onyń sporttyń kúrdeli de mashahatty salasyn damytýǵa qosqan úlken úlesin atap ótti. Ári osyndai qajyrly eńbektiń nátijesinde oblys quramasy elimizdiń úzdik úshtik komandasyna kirgendigin jetkizdi.
Osy rette, Baýyrjan Ospanov baiandama jasap, ózi jetekshilik etken kezeńde atalǵan salany órkendetý jolynda atqarylǵan jumystarǵa qysqasha toqtalyp ótti. Ol áýeli sporttyń qandai túri bolsa da tek qulshynyspen, nietpen ǵana dami qoimaitynyn, ol úshin áýeli salanyń materialdyq-tehnikalyq jaraqtanýyn qamtamasyz etýdiń mańyzdylyǵyn tilge tiek etti. – Maǵan deiin ólkeniń boks salasyna jylyna 30 mln. teńge bólinip kelgen bolsa, búginderi bul kórsetkish 150 mln. teńgege deiin ósti. Bul oqý-jattyǵý jiyndaryn burynǵydai bir ret qana emes, jylyna úsh-tórt márte ótkizýge múmkindik berdi. Osy ýaqyt aralyǵynda oblysymyzdyń aýdan ortalyqtary men aýyldarynda ondaǵan sport ortalyqtary ashylyp, materialdyq bazasy jaqsartyldy. Eńbekshiqazaq aýdanynyń Báiterek aýylynda ulttyq quramany jattyqtyratyn olimpiada rezervi bazasy salynyp, ólkemizde jyl saiyn respýblikalyq jáne halyqaralyq jarystar ótkizildi.Sońǵy on jylda jattyqtyrýshylar men tóreshiler quramy keńeiip, olardyń biliktiligi artty. Qazaq boksynyń damýyna oblysymyzdan shyqqan Qanat Islam, Jánibek Álimhanuly syndy sportshylarymyzdyń jetken jetistikteri úlken yqpal etti. Qosymsha qarjylyq qoldaýdyń nátijesinde 2015 jyly Alakól aýdanynyń Lepsi aýylynda daryndy balalarǵa arnalǵan mektep-internaty ashyldy. Búginde munda 13 jasqa tolǵan 150 jetkinshek bilim alyp, sheberlikterin shyńdaýda. Sport mektebinde oqityn balalardyń barlyǵy stipendiiamen qamtamasyz etilip, respýblikalyq jáne halyqaralyq jarystarǵa tegin qatysýǵa múmkindik aldy, – dedi ol.
Baýyrjan Ospanov budan ári federatsiianyń maqsatty jumysynyń nátijesinde halyqaralyq bailanys nyǵaia túskenin aita otyryp, Taldyqorǵanda ótetin jattyǵý jiyndary men bokstan ótkizilip turatyn jyl saiynǵy «Jetisý» týrnirine Kýba, Resei, Belorýssiia, Ázirbaijan, Ózbekstan, Qyrǵyzstan jáne Tájikstan elderinen sportshylardyń turaqty túrde qatysyp otyrǵanyn jetkizdi.
– Osy barysta «Jetisý» týrniri oblystyq jarystan halyqaralyq deńgeige kóterilip, jarys jeńimpazdaryna «Sport sheberi» ataǵy beriletin deńgeige deiin ósti. Oblystyq boks federatsiiasynyń jumysyn damytý úshin osy jyldar aralyǵynda 1,5 mlrd. teńge qarjy qosymsha jumsalǵany da kóp jaidy ańǵartsa kerek, – dedi federatsiianyń burynǵy basshysy.
Osydan keiin oblys ákiminiń orynbasary, mádeniet pen sport salasyna jetekshilik etetin Jaqsylyq Omar sóz alyp, federatsiia basshylyǵyna úmitker esebindegi josparymen tanystyrdy. Bylǵary qolǵap mamandary men jattyqtyrýshylar tarapynan qoldaý taýyp, federatsiia tóraǵasy bolyp sailansa senimderin aqtaýǵa bar kúsh-jigerin jumsaitynyn jetkizdi. Jiynǵa qatysýshylar Baýyrjan Ospanovtyń ótinishin qabyl alyp, Jaqsylyq Omardy biraýyzdan oblystyq boks federatsiiasynyń prezidenti laýazymyna sailady.
Jaryssózge shyqqan ardager-jattyqtyrýshy Turarbek Omarov pen oblystyq boks federatsiiasy prezidentiniń orynbasary Tursynǵali Edilov Baýyrjan Keńesbekulyna ólkemiz ǵana emes, Qazaqstandaǵy boks sportyn damytýǵa qosqan úlesi úshin alǵystaryn jetkizip, jańadan sailanǵan Jaqsylyq Muqashulynyń jumysyna jemis tiledi.
Qozybai QURMAN,
Almaty oblysy
