Jetisaida lombard qyzmetkerin qarýmen qorqytyp, 1,2 mln teńge jymqyrǵan kúdikti qolǵa tústi, - dep habarlaidy "Ult aqparat" Polisia.kz basylymyna silteme jasap.
Basylym málimetinshe, Jetisai APB-ǵa qalada ornalasqan lombardtardyń biriniń qyzmetkeri aryzdanǵan. Onyń aitýynsha, jumys ornyna keshki ýaqytta basyna jazdyq bas kiim men betine meditsinalyq betperde taǵyp alǵan belgisiz bireý kirip, qarýmen qorqytyp, aqsha talap etken. Úreii ushqan jábirlenýshi sol mezette kúdiktige kassadaǵy 1,2 million teńgeni ustata salǵan. Ońai oljaly bolǵan sezikti oqiǵa ornynan izin sýytqan. Politsiia qyzmetkerleri atalǵan jaitty QR QK-niń 191-baby (Tonaý) boiynsha tirkedi.
Bul qylmysty ashý úshin politsiia bóliminiń tájiribeli qyzmetkerlerinen jedel-tergeý toby qurylyp, oqiǵa ornyna shuǵyl jetti. Politseiler kúdiktini izin sýytpai quryqtaý maqsatynda qajetti sharalardy júzege asyrǵan. Nátijesinde birneshe kún ishinde beinebaqylaý kamerasyndaǵy jazba arqyly kúdiktiniń jeke basy anyqtalǵan.
"Tártip saqshylary kúdiktini turǵylyqty mekenjaiynan ustap, politsiiaǵa jetkizdi. Ol jumyssyz, jergilikti turǵyn bolyp shyqty. Kúdikti tonaý áreketine barmas aldyn qaladaǵy birqatar lombardtardy baqylap shyqqan. Sodan jábirlenýshi taraptyń lombardy keshki deiin isteitinin bilip, atalmysh altyn qabyldaý ornyn tonaýdy dittegen. Barynsha qarańǵy túskenin paidalanyp, óz aram oiyn júzege asyrǵan. Sezikti óz sózinde bul áreketke aqsha qajet bolǵandyqtan barǵanyn aitty. Al aiǵaqty zat retinde kúdiktiniń pnevmatikalyq tapanshasy alyndy. Qazir kúdikti qamaýǵa alynyp, oǵan qatysty tergeý amaldary júrgizilip jatyr", - delingen habarlamada.
