جەتٸسايدا لومبارد قىزمەتكەرٸن قارۋمەن قورقىتىپ, 1,2 ملن تەڭگە جىمقىرعان كٷدٸكتٸ قولعا تٷستٸ, - دەپ حابارلايدى "ۇلت اقپارات" Polisia.kz باسىلىمىنا سٸلتەمە جاساپ.
باسىلىم مەلٸمەتٸنشە, جەتٸساي اپب-عا قالادا ورنالاسقان لومباردتاردىڭ بٸرٸنٸڭ قىزمەتكەرٸ ارىزدانعان. ونىڭ ايتۋىنشا, جۇمىس ورنىنا كەشكٸ ۋاقىتتا باسىنا جازدىق باس كيٸم مەن بەتٸنە مەديتسينالىق بەتپەردە تاعىپ العان بەلگٸسٸز بٸرەۋ كٸرٸپ, قارۋمەن قورقىتىپ, اقشا تالاپ ەتكەن. ٷرەيٸ ۇشقان جەبٸرلەنۋشٸ سول مەزەتتە كٷدٸكتٸگە كاسساداعى 1,2 ميلليون تەڭگەنٸ ۇستاتا سالعان. وڭاي ولجالى بولعان سەزٸكتٸ وقيعا ورنىنان ٸزٸن سۋىتقان. پوليتسييا قىزمەتكەرلەرٸ اتالعان جايتتى قر قك-نٸڭ 191-بابى (توناۋ) بويىنشا تٸركەدٸ.
بۇل قىلمىستى اشۋ ٷشٸن پوليتسييا بٶلٸمٸنٸڭ تەجٸريبەلٸ قىزمەتكەرلەرٸنەن جەدەل-تەرگەۋ توبى قۇرىلىپ, وقيعا ورنىنا شۇعىل جەتتٸ. پوليتسەيلەر كٷدٸكتٸنٸ ٸزٸن سۋىتپاي قۇرىقتاۋ ماقساتىندا قاجەتتٸ شارالاردى جٷزەگە اسىرعان. نەتيجەسٸندە بٸرنەشە كٷن ٸشٸندە بەينەباقىلاۋ كامەراسىنداعى جازبا ارقىلى كٷدٸكتٸنٸڭ جەكە باسى انىقتالعان.
"تەرتٸپ ساقشىلارى كٷدٸكتٸنٸ تۇرعىلىقتى مەكەنجايىنان ۇستاپ, پوليتسيياعا جەتكٸزدٸ. ول جۇمىسسىز, جەرگٸلٸكتٸ تۇرعىن بولىپ شىقتى. كٷدٸكتٸ توناۋ ەرەكەتٸنە بارماس الدىن قالاداعى بٸرقاتار لومباردتاردى باقىلاپ شىققان. سودان جەبٸرلەنۋشٸ تاراپتىڭ لومباردى كەشكٸ دەيٸن ٸستەيتٸنٸن بٸلٸپ, اتالمىش التىن قابىلداۋ ورنىن توناۋدى دٸتتەگەن. بارىنشا قاراڭعى تٷسكەنٸن پايدالانىپ, ٶز ارام ويىن جٷزەگە اسىرعان. سەزٸكتٸ ٶز سٶزٸندە بۇل ەرەكەتكە اقشا قاجەت بولعاندىقتان بارعانىن ايتتى. ال ايعاقتى زات رەتٸندە كٷدٸكتٸنٸڭ پنەۆماتيكالىق تاپانشاسى الىندى. قازٸر كٷدٸكتٸ قاماۋعا الىنىپ, وعان قاتىستى تەرگەۋ امالدارى جٷرگٸزٸلٸپ جاتىر", - دەلٸنگەن حابارلامادا.
