Jeti jasar Milana Davydovany óltirgen er adam ómir boiyna bas bostandyǵynan aiyryldy

Pavlodardyń qylmystyq ister jónindegi mamandandyrylǵan aýdanaralyq soty Milana Davydovany aiýandyqpen óltirý isi boiynsha úkim shyǵardy, dep habarlaidy "Ult aqparat".

Qyzdyń anasy qylmysqa qatysqany úshin 20 jylǵa bas bostandyǵynan aiyryldy. Sottalǵandar óz kinálaryn moiyndamady.

"Sottalýshylardyń áreketteri asa aýyr qylmystar sanatyna jatady jáne negizgi jaza retinde 20 jylǵa bas bostandyǵynan aiyrý nemese ómir boiyna bas bostandyǵynan aiyrýdy kózdeidi. Ábildinov qylmystyq kodekstiń "Kámeletke tolmaǵan adamdy asa qatigezdikpen óltirý" baby boiynsha kináli dep tanyldy. Oǵan qaýipsizdigi joǵary mekemede ómir boiyna bas bostandyǵynan aiyrý jazasy taǵaiyndaldy," – dedi sýdia Nurlan Qaiyrbekov.

Sonymen qatar, er adam alkogolge táýeldilikten emdeledi.

Qylmystyq kodekstiń 46-babynyń 4-bóligine sáikes, ómir boiyna bas bostandyǵynan aiyrý jazasy áielderge taǵaiyndalmaitynyna bailanysty, sot áielge 20 jylǵa bas bostandyǵynan aiyrý jazasyn berdi. Sondai-aq, ol pedagogikalyq jáne kámeletke tolmaǵandarmen jumys isteýge bailanysty laýazymdardy atqarý quqyǵynan aiyryldy.

"Davydovaǵa 20 jylǵa bas bostandyǵynan aiyrý jazasyn ortasha qaýipsizdiktegi túzeý koloniiasynda óteý týraly úkim shyǵaryldy," – dedi sýdia.

Úkim zańdy kúshine engen joq jáne oǵan shaǵym jasaýǵa bolady.

Sot úkimi jariialanǵannan keiin aiyptalýshy narazylyq belgisi retinde ózine zaqym keltirdi.

Eske salsaq, byltyr qarasha aiynda Besqaýǵa aýylynda jeti jasar Milana Davydova iz-tússiz joǵalyp ketti. Ony izdeýge 500-ge jýyq adam jumyldy. Birneshe kúnnen keiin qyzdyń anasy jasaǵan qylmysyn moiyndap, qyzynyń denesin jasyrǵan oryndy kórsetti. Sondai-aq qylmysqa taǵy bir er adamnyń qatysy bary anyqtaldy. Ol áielge qyzdyń denesin jasyrýǵa kómektesken.