Tokio Olimpiadasynyń qola júldegeri Sáken Bibosynovty túrkistandyq jankúierleri Túrkistan qalasyndaǵy halyqaralyq áýejaidan kútip aldy, dep habarlaidy "Ult aqparat".
Tokio tórinde ótken dodada álemniń eń úzdik boksshylarymen taitalasyp, Alashtyń mereiin asyrǵan jerlesimizdi oblys ákimi Ómirzaq Shókeev, Túrkistan jastary, sportshynyń áriptesteri, týǵan-týystary men dostary qarsy aldy. Qazaqstannyń abyroiyn asqaqtatqan boksshyǵa Túrkistan oblysynyń kásipkerleri temir tulpar mingizdi.
«Túrkistan oblysynyń tarihynda alǵashqy Olimpiada medalin utyp alǵan Sáken ózin úzdik sportshy ekenin kórsetti. Oǵan barlyǵymyz jankúier boldyq, kýá boldyq. Bul altynǵa bergisiz qola júlde boldy. Bizge úlken mártebe. Túrkistan oblysynyń barlyq sportshylaryna jeńis tuǵyrynan kórinýge tilektespiz», - dedi oblys ákimi.
Bokstan Tokio Olimpiadasynda 52 keli salmaq dárejesinde synǵa túsken 24 jastaǵy sportshy jartylai finaldyq jekpe-jekte Ulybritaniia sportshysy Galal Iafaimen kezdesip, Olimpiadanyń qola júldegeri atandy.
«Meni qoldaǵan barsha qazaq eline, halqyma sheksiz alǵysymdy aitamyn. Árine, negizgi maqsatymyz altyn bolǵan. Buiyrǵany osy boldy. Allaǵa shúkir deimin. Qazaqtyń atyn álemge tanytý úshin aldaǵy ýaqytta da bar kúsh-jigerimdi salýǵa ýáde beremin», - dedi Tokio Olimpiadasynyń qola júldegeri Sáken Bibosynov.
Sáken Bibosynov - Túrkistan oblysy, Sairam aýdanynyń turǵyny. Otbasyndaǵy úsh uldyń kenjesi.
Jasynan sportqa jaqyn bolǵan. Aldymen fýtbolmen shuǵyldanyp, keiin úlken aǵasynyń artynan erip, boksqa kelgen.
Ulttyq qurama múshesi. Álem chempionaty men Aziia chempionatynyń qola júldegeri. Otandasymyz Tokio tórinde 4 kezdesý ótkizdi.
Ol Pýerto-Rika, Frantsiia, Ispaniia boksshylaryn jeńdi. Jalpy Túrkistan oblysynan Tokio Olimpiadasyna 5 sportshy attanǵan bolatyn.
Sonyń biri - Sáken Bibosynov qola medalge ie bolyp, senimdi aqtady.
