2020 jyly jergilikti joldardy jóndeýge 259 mlrd teńge qarastyrylǵan. Bul týraly Ortalyq kommýnikatsiialar qyzmetindegi brifingide QR IIDM Avtomobil joldary komitetiniń tóraǵasy Sairanbek Barmaqov aitty, dep habarlaidy QazAqparat tilshisi.
«Avtomobil joldary salasynyń aldynda turǵan basym mindetterdiń biri – qazaqstandyqtardyń óz úiine sapaly jolmen jetýin qamtamasyz etý. Jergilikti joldardyń jalpy uzyndyǵy 70,9 myń shaqyrymdy quraidy. 2020 jyly jergilikti joldardy jóndeýge 259 mlrd teńge qarastyrylǵan. Onyń 4,1 mlrd teńgesi oblystyq jáne aýdandyq mańyzy bar joldardy jóndeý, 52,9 mlrd teńgesi respýblikalyq mańyzy bar qalalardyń kóshelerin jóndeý, Nur-Sultan jáne Almaty qalalaryndaǵy jer telimderin satyp alý maqsattaryna jumsalmaq», - dedi Sairanbek Barmaqov.
Onyń atap ótýinshe, jyl sońyna deiin avtomobil joldarynyń 4 myń shaqyrymyn jóndeý jumystarymen qamtý josparlanǵan. Bul rette el óńirlerinde 350 joba iske asyrylyp, jóndeý jumystaryna 30,5 myń adam jumyldyrylady. Sondai-aq, jaqsy jáne qanaǵattandyrarlyq jaǵdaidaǵy jergilikti joldardyń úlesi 75 paiyzǵa jetkiziledi.
«Jóndeý jumystary osyndai qarqynmen júrgizilse, 2025 jylǵa qarai jergilikti avtomobil joldary jelisiniń 27 myńnan astam shaqyrymy jóndeletin bolady. Bul óz kezeginde jaqsy jáne qanaǵattandyrarlyq jaǵdaidaǵy oblystyq jáne aýdandyq mańyzy bar joldardyń úlesin 95 paiyzǵa deiin jetkizýge múmkindik beredi», - dedi komitet tóraǵasy.
