QR Premer-Ministri Baqytjan Saǵyntaev Qazaqstanǵa tartylǵan investorlardyń aimaqtarda birqatar kedergilerge tap bolatynyna alańdap otyr. Sonyń biri - jergilikti biliktiń til bilmeýi, dep xabarlaidy QazAqparat tilshisi.
"Qazirgi kezde biz ulttyq investitsiialyq strategiiany ázirlep jatyrmyz. Ol da - Prezidenttiń tapsyrmasy. Osy jumysqa xalyqaralyq sarapshylar tartylyp otyr. Sondai-aq, biz ózimizdiń aimaqtaǵy áriptesterimizge osy máseleniń mańyzdylyǵyn túsindirdik. Sebebi dál sol aimaqtarda kóptegen máseleler týyndaidy. Endi, biz, Úkimette otyrǵandar, investitsiialyq saiasatty ózgertýdiń qajettiligin jaqsy túsinemiz. Sol sebepti osy saladaǵy jumystyń aimaqtarda turalap qalǵanyn qalamaimyz. Sondyqtan oblys ákimderiniń investitsiialar jónindegi orynbasarlarymen qosymsha keńester ótkizdik. Biz keibir basshylardyń osy salada jumys isteýge áli de daiyn emes ekenin baiqadyq. Tildi tiisti deńgeide bilmeitinderi de kóp nárseni ańǵartady. Iá, olardyń basqa da jumystary da jetip artylady. Ony da bilemiz. Osyǵan bailanysty biz Prezident Ákimshiligine tiisti xatty ázirlep jatyrmyz. Investitsiialardy tartý jumysyn retke keltirý kerek", - dedi Saǵyntaev búgin Qazaqstannyń investitsiialyq áleýetin tanystyrýǵa arnalǵan sharada. Atalǵan sharada QR Investitsiialar jáne damý ministri Jeńis Qasymbek pen "Kazakh Invest" ulttyq kompaniiasynyń basshylyǵy shet memleketterdiń elshilerine investitsiialardy tartý, shetel investorlaryna yńǵaily jaǵdai jasaý salasyndaǵy jumystar jaiynda baiandap berdi.
Premer-Ministrdiń aitýynsha, búginde shetel investitsiialaryn tartýdyń burynǵy júiesi tolyǵymen ózgertildi. Osy salada arnaiy "Kazakh Invest" ulttyq kompaniiasy quryldy. Al kompaniianyń direktorlar keńesi Úkimet basshysy dárejesine deiin kóterildi. "Keńestiń tóraǵasy men bolamyn. Biz direktorlar keńesiniń mártebesin ádeii kóterdik. Sonyń ózi investitsiialyq saiasattyń basymdyǵyn, Qazaqstan úshin qanshalyqty mańyzdy ekenin kórsetse kerek", - dep atap kórsetti Saǵyntaev.
