Qazaqstan fermerler qaýymdastyǵynyń tóraǵasy Jigýli Dairabaev jer reformalary jóninde usynymdaryn bildirdi, dep habarlaidy QazAqparat.
«QR Prezidenti Qasym-Jomart Toqaevtyń 2021 jyldyń 25 aqpanynda bes jylǵa sozylǵan jer daýyna núkte qoiǵanyn tarihi jetistik dep aitar edim. Sebebi, jer jekemenshikte bolýy kerek degen naryqtyq ekonomikanyń qiturqy sharttaryna baǵynbaityn, jerdi satýdy anany satýmen teń kóretin arly el ekenimizdi dáleldei bildik. Prezidentimizge osyndai batyl sheshim qabyldaǵany úshin alǵysymyzdy bildiremiz. Endigi kezekte jer reformalarynan týyndaityn ózgerister men tolyqtyrýlardyń tek qana halyq múddesine baǵyttalýyn qamtamasyz etýimiz qajet», - dedi J. Dairabaev Jer reformasy jónindegi komissiianyń birinshi otyrysynda.
Ol úshin spiker komissiia jumysynyń kún tártibine bes máseleni engizýdi surady.
«Birinshi, jerdiń Qazaqstan azamattary úshin 49 jylǵa jalǵa berilýin shegerý qajet. Onymen qosa, jalǵa alý quqyǵyn saqtai otyryp, jerdiń atadan balaǵa mura bolyp qalýyn qamtamasyz etken jón. 49 jyl paidalaný quqyǵy bitken soń, sol jer paidalanýshy nemese onyń urpaǵy ári qarai paidalanýǵa alý úshin basym quqyqqa ie bolýy kerek. Ol úshin Jer kodeksiniń 37 jáne 97 baptaryn túbegeili qarastyrýdy suraimyz. Endi jerge bailanysty daý tartystyń keleshekte kóterilmeýin tereńirek oilaýymyz qajet, iaǵni, jer tek óz azamattarymyzǵa jalǵa berilýi kerek. Olai bolmaiynsha, ár ýaqytta halyq pen bilik arasyndaǵy túsinistik pen senimge syzat túsý qaitalana berilýi, jáne ol ulǵaimasa, azaimaýy múmkin.
Aita keteiik, búgin Jer reformasy jónindegi komissiianyń birinshi otyrysy jumysyn bastady. Sanitarlyq normalardy saqtaý qajettiligine bailanysty komissiia jumysy Aýyl sharýashylyǵy ministrliginiń resmi saitynda jáne Facebook paraqshasynda onlain kórsetilýde.
