Parlament Májilisiniń depýtaty Berik Ospanov jer qatynastaryn damytý máseleleri boiynsha zań jobasynyń negizgi jańalyqtaryna qatysty pikir bildirdi, dep habarlaidy QazAqparat.
Aita keteiik, búgin Májilistiń jalpy otyrysynda «Qazaqstan Respýblikasynyń keibir zańnamalyq aktilerine jer qatynastaryn damytý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy.
«Memleket basshysynyń tapsyrmasymen Jer reformasy jónindegi komissiia qurylǵanyn bilesizder. Naýryz aiynyń sońynan bastap bir ai kóleminde biraz máseleni talqylap, tiisti zań jobasy ázirlendi. Osy oraida jalǵa alý quqyqtaryn jetildirý máselesi qaraldy. Sonymen qatar, qazaqstandyqtarǵa jekemenshikke jer berý máselesi boiynsha naqty kelisim bolmaǵannan keiin, usynys boiynsha moratorii 5 jylǵa uzartylyp jatyr. Bul baǵytta tolyq sheshim joq, iaǵni jekemenshik kerek nemese jekemenshik kerek emes degen pikir bar. Sondyqtan bul másele taǵy qoǵamdyq talqylaýda bolady dep, tiisti usynys jasaldy», - dep toqtaldy B. Ospanov.
Onyń aitýynsha, qazirgi kezde ortalyq deńgeidegi quzyrly organ – Aýyl sharýashylyǵy ministrliginde jer zańnamasyn saqtaý, jer sapasyn qorǵaý, maqsatty paidalanýdy qadaǵalaý jóninde ókildigi bolmai tur. Bul fýnktsiialar óńirlerge júktelgen.
«Sol sebepti sońǵy jyldary zań buzýshylyq jaǵdailary kóbeiip ketken. Endi jańa zań jobasy óńirlik deńgeiden respýblikalyq deńgeige baqylaý men tekserý fýnktsiialaryn qaitadan ortalyqqa berý boiynsha óziniń sheshimin taýyp otyr. Sonymen birge, jer paidalanýshylardyń quqyqtaryn qorǵaý jaǵynan qosymsha múmkindikter eskerilgen. Munymen qosa, olardyń jaýapkershiligi de kúsheitilmek, iaǵni jerdi maqsatty paidalanbasa, onda jaýapkershilik bolady», - dedi depýtat.
Onyń sózine qaraǵanda, qujat aiasynda derekter ashyqtyǵyna ekpin qoiylǵan. Jerdi alǵan azamattar men mekemeler týraly málimetter ashyq qoljetimdi bolady.
«Kópshiliktiń usynysy boiynsha biraz ózgeris engizilgen. Jumys tobynyń qyzmeti barysynda qosymsha zańnyń normalaryn kúsheitetin, naqtylaityn tiisti ózgerister qujatqa engizilgen bolatyn. Búgin birinshi oqylymda maquldandy. Endi ekinshi oqylymǵa deiin talqylanatyn birqatar norma bar. Jumys tobynyń otyrysyna 40-qa jýyq adam adam qatysyp keledi. Olardyń arasynda depýtattar, múddeli memlekettik organdardyń ókilderi, «Atameken» UKP ókilderi, saiasi partiialardyń músheleri, qoǵam qairatkerleri, sala mamandary atsalysyp jatyr. Bizdiń ustanymymyz – Jer reformasy jónindegi komissiiasynyń sheshimderin zańdastyrý», - dedi Berik Ospanov.
Budan bólek ol zań jobasy aiasynda aýyldyń mańyndaǵy jerlerdi eldiń paidalanýyna qaitarý, eldi meken ainalasyndaǵy jaiylymnyń kólemin anyqtaý jóninde tiisti qadamdar eskerilgenin atap ótti.
Zań jobasynyń negizgi ózgeristeri men tolyqtyrýlary:
- qazaqstandyqtarǵa jáne qazaqstandyq zańdy tulǵalarǵa aýyl sharýashylyǵy maqsatyndaǵy jerlerdi 49 jylǵa deiingi merzimge jalǵa berý;
- Jer resýrstaryn basqarý komitetine jerdi paidalaný men qorǵaýdy memlekettik baqylaý fýnktsiialaryn ákimdikterden qaitarý;
- aýyl sharýashylyǵy jerleriniń nysanaly maqsatyn «baǵbandyq» jáne «saiajai qurylysyna» ózgertýge tyiym salý;
- halyqtyń muqtajyn qanaǵattandyrý maqsatynda, jergilikti jaǵdailardy eskere otyryp, jaiylymdardy basqarý jónindegi josparlarda, qajetti jaiylym alqabynyń shekarasyn aiqyndaý;
- aýyl sharýashylyǵy maqsatyndaǵy jerlerdi jeke menshikke berýge moratoriidiń qoldanylý merzimin 2026 jylǵy 31 jeltoqsanǵa deiin uzartý.
