Aýyl sharýashylyq jerleriniń qunaryn baqylaý úshin zerthanalyq bazany damytý kerek. Bul týraly QR Aýyl sharýashylyǵy ministrligi jer reformasy komissiiasynyń otyrysynda ekonomikalyq jumys tobynyń jetekshisi Aqylbek Kúrishbaev aitty, dep habarlaidy QazAqparat.
«Elimizde aýyl sharýashylyq jerleriniń qunaryn baqylaý úshin zerthanalyq bazany damytý kerek. Naqty aitar bolsaq, «Azamattarǵa arnalǵan úkimet» memlekettik korporatsiiasynyń topyraqtyq-geobotanikalyq zerthanalar jelisin, sondai-aq, QR AShM-nan «Agrohimiia qyzmeti respýblikalyq ǵylymi-ádisteme ortalyǵy» mekemesin jer resýrstary salasyndaǵy ýákiletti organǵa (jer resýrstaryn basqarý komitetine) berý kerek. Qazirgi ýaqytta komitettiń ózine baǵynyshty eshqandai zerthanasy joq. Sondyqtan eki mekemedegi zerthanalardy tikelei jer resýrstary komitetiniń nemese jańadan qurylatyn jer resýrstary agenttiginiń quzyryna berý týraly usynys aityp otyrmyz», - deidi ekonomikalyq jumys tobynyń basshysy Aqylbek Kúrishbaev.
Onyń aitýynsha, bul usynysty ekonomikalyq máseleler boiynsha jumys tobynyń otyrysyna qatysqan 30 adamnyń 25-i qoldap, 5-eýi qarsy bolǵan.
«Usynysty qoldaǵandardyń ishinde 2 adam ózderiniń erekshe pikirin aitty. Olardyń oiynsha, eń aldymen topyraqtyq-geobotanikalyq zerthanalar qyzmeti bastapqy kezde jer resýrstary salasyndaǵy ýákiletti organǵa berilýi tiis. Keiin jerdiń topyraq jáne botanikalyq sapasyn tekserýge qajetti qyzmetterdi paidalanýdyń algoritmderi jasaqtalǵan soń bul zerthanalardyń qyzmet kórsetýin básekelestik ortaǵa berý kerek», - deidi ol.
