Qazaqstandaǵy jer qoinaýyn paidalanýshylarǵa arnalǵan alǵashqy onlain-aýktsionnan 61 mlrd teńge tústi.
Qazaqstanda kómirsýtekterdi barlaý jáne óndirý quqyǵyna arnalǵan alǵashqy onlain aýktsiondar ótti, dep habarlaidy QR Energetika ministrliginiń baspasóz qyzmeti.
Saýda-sattyq astana ýaqytymen 10:00-de bastaldy, al qatysýshylar úshin aýktsion zalyna kirý tańǵy 9-dan bastap qol múmkin boldy.
Jalpy alǵanda, aýktsiondarda jeti ýchaske boiynsha barlaý jáne óndirý quqyǵy iske asyryldy. Olar boiynsha bastapqy baǵa 263 million teńgeni qurady. Ol nátijesinde 230 esege artyp, 61 milliardqa deiin ósti. Bir ýchaske boiynsha bastapqy quny 1000 esege ósti.
Eń uzaq saýda-sattyq eki ýchaske – «Zabýrýne» jáne «Saraishyq» ýchaskeleri boiynsha ótti. Osy eki ýchaske boiynsha aýktsiondar tańǵy 10:00-de bastalyp, keshke deiin jalǵasty. Nátijesinde «Zabýrýne» ýchaskesine barlaý jáne óndirý quqyǵy 16,3 milliard teńgege satyldy, ol boiynsha aýktsion saǵat 15:20-da aiaqtaldy.
«Saraishyq» ýchaskesi boiynsha aýktsion resmi aiaqtalǵanǵa deiin, iaǵni saǵat 17:00-ge deiin jalǵasty. Ýchaskedegi barlaý jáne óndirý quqyǵynyń jalpy quny 43 mlrd. teńgeni qurady. Bul rette, bastapqy baǵasy 43 mln. teńge bolatyn.
Aýktsion arqyly jerge menshik quqyǵy emes, jer qoinaýyn paidalaný quqyǵy beriletinin atap ótý mańyzdy. Bul quqyq «Jer qoinaýy jáne jer qoinaýyn paidalaný» kodeksimen retteledi, ýchaskelerdegi kez kelgen tehnologiialyq protsester QR Energetika ministrligi janyndaǵy Barlaý jáne igerý jónindegi ortalyq komissiiada qaralady.
Jer qoinaýyn paidalaný quqyǵyn alǵan investor jergilikti atqarýshy organmen jerdi jaldaý týraly shartqa qol qoiady. Jobalaý qujatyn ázirleý aldynda árbir jer qoinaýyn paidalanýshy jergilikti turǵyndardyń qatysýymen qoǵamdyq tyńdaýlar ótkizýge mindetti.
Aýktsiondar onlain rejiminde jáne jasyryn ótetindikten, qatysýshylar bir-birin kórmeidi. Bul aqparat osy aýktsiondardyń ótkizilýine jetekshilik etetin QR Energetika ministrliginiń mamandary úshin de qol jetimdi emes.
Onlain aýktsion qyzmeti 2020 jyldyń 1 qyrkúieginde Memlekettik múlik tiziliminiń www.gosreestr.kz portalynda iske qosyldy, onyń ázirleýshisi jáne iesi «Aqparattyq-esepteý ortalyǵy» AQ.
Sarapshylar jańa tetik naryqty ashyq etip, biznes úshin de, memleket úshin de shyǵyndardy aitarlyqtai azaitady dep boljaidy.
Búgin 82 ýchaske týraly aqparatty qamtityn interaktivti karta barlyǵyna da qoljetimdi. Obektilerdiń árqaisysy boiynsha aýktsionǵa bastamashylyq jasaý úshin áleýetti investorǵa tek onlain rejiminde ótinim berý qajet, sodan keiin ken ornyn barlaý jáne igerý quqyǵyn aýktsionǵa shyǵarý protsesi bastalady.
«Aýktsionnyń barysyn kez kelgen adam baqylai alady. Operator, iaǵni «Aqparattyq-esepteý ortalyǵy» AQ, Qazaqstan Respýblikasy Energetika ministrliginiń tapsyrysy boiynsha jeke ashyq aýktsion zalyn qurdy. Aýktsionnan túsken barlyq qarajat memlekettik biýdjetti toltyrady», - delingen habarlamada.
