Jer qoinaýyn paidalanýshylardyń jergilikti taýarlardy satyp alýy boiynsha Erikti kelisimder jasasý tetigi engiziledi. Bul týraly Úkimet otyrysynda QR Saýda jáne integratsiia ministri Baqyt Sultanov aitty, dep habarlaidy QazAqparat.
«Saýda jáne integratsiia ministrliginiń qyzmeti salasyna qatysty Memleket basshysy tarapynan birqatar naqty tapsyrma berildi. Olardy iske asyrý maqsatynda ishki jáne syrtqy saýdany damytý úshin bastamalar ázirlendi. Birinshiden, Dúniejúzilik saýda uiymyna múshelik aiasynda biyl 5 jyldyq ótpeli kezeńniń aiaqtalýyna bailanysty jer qoinaýyn paidalanýshylardyń qazaqstandyq taýarlardy satyp alý mindettemesi joiyldy. Óndirýshilerdi qoldaý retinde jer qoinaýyn paidalanýshylardyń jergilikti taýarlardy satyp alýy boiynsha Erikti kelisimder jasasý tetigi engiziletin bolady», - dedi ministr. Bul rette, onyń aitýynsha, jer qoinaýyn paidalanýshylar satyp alý qyzmetin ózderi derbes rettei alady. Tiisti zańdy túzetýler Parlament Májilisiniń qaralýynda jatyr.
«Sonymen qatar, qosymsha qoldaý sharalary pysyqtalyp jatyr. Olar: jer qoinaýyn paidalanýshylardyń satyp alýyna qatysý úshin taýar óndirýshiler men adal jetkizýshilerdiń tizilimin bekitý jáne satyp alý protsesterinde ulttyq standarttardy qoldaný. Qurmetti Asqar Uzaqbaily, osy másele boiynsha tiisti memlekettik organdarǵa biznes ókilderimen birlesip qysqa merzimde naqty sharalar qabyldaý boiynsha tapsyma berýińizdi suraimyn», - dedi Baqyt Sultanov Úkimet basshysy Asqar Maminge qarata.
