Jer reformasy jónindegi komissiianyń úshinshi otyrysynda Aýyl sharýashylyǵy ministrliginiń janynan aýyldyq aýmaqtardy damytý jónindegi arnaiy komitet qurý usynyldy, dep habarlaidy QazAqparat.
Komissiianyń ekonomikalyq máseleler jónindegi jumys toby Salyq kodeksine aýylsharýashylyq jerlerine túsken salyqtardy tórtinshi deńgeidegi biýdjetke aýdarý bóliginde ózgerister engizý máselesin komissiianyń qaraýynan alyp tastaýdy usyndy.
«Bul suraqty kún tártibinen alyp tastaýdy usynamyz. Óitkeni atalǵan máselege qatysty Memleket basshysynyń tapsyrmasyna sáikes, tiisti zań jobasy qazirgi tańda Májiliste qaralyp jatyr», - dedi jumys tobynyń basshysy Aqylbek Kúrishbaev.
Óz sózinde A.Kúrishbaev agrarlyq elderde aýyldyq aýmaqtardyń damýy Aýyl sharýashylyǵyna jaýapty ministrliktiń quzyryndaǵy másele ekenin eske saldy.
«Taǵy bir másele – aýyldyq aýmaqtardy damytý máselelerin úilestirý úshin Aýyl sharýashylyǵy ministrliginiń janynan aýyldyq aýmaqtardy basqarýdy qurý komitetin qurý. Bul suraq tikelei jer reformasyna tiisti bolmasa da, aýyldyq eldi mekenderdi damytýǵa bailanysty. Ózderińiz bilesizder, aýyldaǵy jaǵdai shynynda da ońai emes. Jumyssyzdyq kóbeiýde, biraz infraqurylymdyq máseleler sheshilmei tur. Sondyqtan aýyldyq aýmaqtardy damytýǵa baǵyttalǵan arnaiy «Aýyl – el besigi» ulttyq jobasyn qabyldap, AShM janynan arnaiy komitet ashqanymyz durys bolar edi. Byltyr Parlamenttik tyńdaýda da Parlament Senaty Úkimetke osyndai usynys bergen. Kóptegen Eýropa memleketterinde, Kanada, Aýstraliia, Resei, Belarýs jáne taǵy basqa agrarlyq elderde aýyldyq aýmaqtar máseleleri Aýyl sharýashylyǵy ministrliginiń quzyrynda retteledi. Óitkeni agrarlyq óndiris pen aýyldyq aýmaqtardy damytý birtutas dúnieniń eki bóligi», - dedi komissiia múshesi.
Onyń aitýynsha, bul usynysty ekonomikalyq máseleler jónindegi jumys tobynyń músheleri tolyqtai qoldaǵan.
