Saryaǵash aýdanynyń Jartytóbe aýyldyq ákimshiliginde turatyn jetpisti alqymdap qalǵan tájik azamaty Nýrali Shoaliev 1949 jyly (sol kezdegi Shymkent oblysy, Bostandyq aýdany, Uzyn aýylynda) kópbalaly otbasynda dúniege kelgen.
Qyryq jyl ómirin qurylys salasyna arnaǵan Nýrali Zikirýllauly óz úiiniń aýlasyndaǵy 10 sotyq jerge jylyjai salyp, qiiar, qyzanaq, kókónis egýdi qolǵa alǵan. Balalaryn da osy kásipke úiretti.
– Diqanshylyqty aldymen úi aýlasyndaǵy jerden bastadym. Alǵashqy ónimdi bazarǵa shyǵardyq. Kele-kele jylyjaidyń nanyn jegen soń, jer alyp ony úlkeitý kerek degen oi keldi. Sodan aýyl ákimshiliginen biik qyrattyń tómengi jaǵynan 6,44 gektar jer aldym. Sóitip, atakásibimiz – diqanshylyqqa birjolata bet burdym. Aldymen alǵan jerimdi tegistep, jylyjai qural-jabdyqtaryn satyp ákelip, ornatyp, qiiar, qyzanaq, kókónis ektik. Túsken paidaǵa kelesi jyly taǵy jylyjai saldym. Qazirgi tańda 2 gektardan artyq jerde jylyjai, 2 gektarǵa jýyq baý-baqsham bar. Kelesi jyly bir gektarǵa limon, bir gektarǵa júzim ekpekpin. Allanyń bergen úsh ul, eki qyzym bar. Qolymda kenje ulym turady. Jylyjaidyń barlyq jumystary sonyń moinynda. Bir ulym Soltústik Qazaqstan oblysynda biznespen ainalysady, iaǵni bizdiń jylyjaidan jinaǵan ónimimizdi sol jaqta ótkizip otyrady. Jylyna úsh ret ónim alamyz. Qazirgi tańda qiiar, qyryqqabat sekildi túrli kókónister ósirip jatyrmyz. Qysqa qarai qyzanaq kóshetterin otyrǵyzamyz. Jylyjai salý, olardy kútip-baptaý, ár kóshetke tamshylatyp sý berý, túbin qopsytý, tyńaitqyshtarmen qamtamasyz etý, ónim jinaý, ony ótkizý aitýǵa ońai bolǵanmen mashaqaty qiyn sharýa. Dese de, bárine kóndigip kettik. Bastaǵan isti aiaqsyz qaldyrýǵa bolmaidy. Qysqa qarai aǵash, kómir daiyndaimyz. Ol da qarjyǵa kelip tireledi. Diqan bolǵan soń kóp nárseni bilýiń kerek. Qazirgi tańda aýdanda diqandarǵa aqyl-keńes beretin agronomdar joqtyń qasy. Sondai-aq, jer jaǵdaiyn biletin, topyraq quramyn anyqtaityn arnaiy zerthananyń bolmaýy da jumysymyzdyń alǵa jyljýyna kedergisin keltirip jatqany jasyryn emes. Áiteýir buryn istegen aýyl qariialarynan surastyryp, sosyn ózimiz gazet-jýrnaldardan oqyp bilgenimizben eńbek etip kelemiz, – deidi Nýrali Shoaliev aqsaqal.
2015 jyly diqan Nýrali qariia Saryaǵash aýdanyndaǵy tájik mádeni ortalyǵyna tóraǵa bolyp sailandy. Mine, sodan beri ulttar arasyndaǵy dostyqty jandandyrý maqsatynda túrli is-sharalar uiymdastyryp, jastar arasynda yntymaq pen aýyzbirshilik, tatý-tátti ómir súrý jóninde úgit-nasihat júrgizýden sharshaǵan emes. Odan bólek, ár mektep, ár eldi mekenderdegi kezdesýlerge qatysyp, kókeiindegi oilarymen bólisedi. Aýdan, oblystaǵy jiyndarǵa da ýaqyt tabady.
«Júzi basqa júregi bir, tili basqa tiregi bir» tájik ultynyń azamaty Nýrali Zikirýllauly Shoaliev mine, osyndai jan.
Nartai Serkebaev, «Ońtústik Qazaqstan»
