Qazaqstandyq jas ánshi, «Slavian bazary» halyqaralyq baiqaýynyń Gran-pri iegeri Rýhiia Baidúken jeńisten keiingi óz áserimen bólisti, dep habarlaidy QazAqparat.
«Kóńil kúiim keremet. Bul meniń eń alǵashqy úlken jeńisim jáne ony qazaq eline arnaimyn. Sebebi men otandastarymnyń qoldaýyn sezindim. Sonymen qatar osyndaǵy jergilikti halyq ta qoldaý kórsetti. Men ózim mýzykamen mektep jasynan bastap ainalysyp kelemin. Mektep bitirgen soń mýzykalyq kolledjge túsip, ony támamdap, qazir ulttyq óner akademiiasynyń 3 kýrs stýdentimin. Aldaǵy maqsatym – óz ánderimdi oryndap, soǵan klip túsirý. Sol siiaqty qazaqstandyq jáne sheteldik televiziialyq jobalarǵa qatysý. Sheteldik prodiýser nemese kompaniialardan usynys túsip jatsa, jumys isteýge ázirmin», - dedi jas ánshi Rýhiia Baidúken ZOOM alańynda ótken baspasóz máslihatynda.
Sondai-aq, jerlesimiz, ánshi Dimash Qudaibergen qoldaý kórsetkenin aityp ótti.
«Dimash Qudaibergen baiqaýǵa deiin óz keńesterin berip, qoldaý kórsetti. Ásirese vokal jaǵynan súiemeldeý kórsetti. Baiqaý bastalǵan soń biz sóilespedik, óitkeni ol tóreshi al men qatysýshymyn. Sondyqtan biz saiystyń ádil ótýin qaladyq», - deidi ol.
Buǵan deiin jerlesimiz Rýhiia Baidúkenniń Vitebskide ótken «Slavian bazary» baiqaýynyń gran-pri júldesin jeńip alǵanyn habarlaǵan bolatynbyz.
14 memleketten kelgen qatysýshy slavian elinen shyqqan kompozitordyń týyndysyn slavian tobyna jatatyn tildiń birinde orkestrdiń súiemeldeýimen oryndady. Baiqaý nátijesinde qazaqstandyq Rýhiia Baidúkenova Gran-pri iegeri atanyp, «Altyn lira» músinshesimen birge 20 myń AQSh dollaryna ie boldy.
Aita ketsek, «Slavian bazary» halyqaralyq baiqaýynyń jeńimpazy Rýhiia Baidúkendi Memleket basshysy Qasym-Jomart Toqaev arnaiy quttyqtady.
Odan bólek, jas ánshini jeńisimen elimizdiń Mádeniet jáne sport ministri Aqtoty Raiymqulova da quttyqtady.
