Búgin Parlament Májilisiniń jalpy otyrysynda depýtattar Ekinshi dúniejúzilik soǵysynyń ardagerlerine Jeńis kúni qarsańynda beriletin birjolǵy aqshalai kómekti birkelki mólsherde bólýdi usyndy, dep habarlaidy QazAqparat.
«Jergilikti atqarýshy organdar jyl saiyn Jeńis kúni qarsańynda Ekinshi dúniejúzilik soǵys ardagerlerine, olarǵa teńistirilgen adamdarǵa jáne tyl eńbekkerlerine birjolǵy aqshalai kómek kórsetedi. Ardagerlermen kezdesýler barysynda olar ár óńirde tólemder ártúrli ekenin aityp otyr. Sebebi onyń mólsherin jergilikti organdar aiqyndaidy. Biyl Jeńis kúnine orai beriletin tólemder qandai mólsherde bolady? Bizdiń oiymyzsha, mundai tólemderdiń biryńǵai mólsherin aiqyndaý oryndy», - dedi depýtat Balaiym Kesebaeva.
Óz kezeginde QR Eńbek jáne halyqty áleýmettik qorǵaý ministri Birjan Nurymbetov Úkimette Jeńis kúnine beriletin tólemder Qazaqstan boiynsha birkelki bolǵanyn nazarǵa alyp otyrǵanyn jetkizdi.
«Osyǵan qatysty Úkimettiń basshylyǵymen tiisti usynys ákimdikterge berilgen. Bul jerde biz tómengi mólsherin belgiledik. Ekinshi dúniejúzilik soǵystyń qatysýshylaryna, múgedekterine eń tómengi soma 300 myń teńgeden kem emes... Biraq óńirlerde eger múmkindikteri bolsa, keibir oblystar odan da joǵary beremiz dep josparlaýda», - dedi ministr.
Parlament Májilisiniń tóraǵasy Nurlan Nyǵmatýlinniń atap ótýinshe, atalǵan tólemderdiń biryńǵai mólsheri bolǵany durys.
«Árine, tólem somasy az bolmaýy kerek. Jeńiske 75 jyl tolyp otyr. Sondyqtan depýtat aitqandai, mundai tólemderdiń biryńǵai mólsherin aiqyndaý kerek. Osyny Úkimettiń usynysy boiynsha qarap shyǵyńyz, alda ýaqyt bar», - dedi N. Nyǵmatýlin Eńbek ministrine qarata aitqan sózinde.
