Qaraǵandy oblysynyń ákimi Jeńis Qasymbek óńirde "ýahabizm" dástúrli emes dini aǵymynyń ókilderi birneshe esege azaiǵanyn aitty, dep habarlady Sputnik Qazaqstan.
Búgin oblys ákimi elordadaǵy Qazaqstan Prezidenti janyndaǵy ortalyq kommýnikatsiialar qyzmetinde baspasóz máslihatyn ótkizip, óńirdiń basty jetistikteri men josparlary, áleýmettik-ekonomikalyq damý qorytyndylary týraly baiandady.
Baspasóz konferentsiiasy barysynda Jeńis Qasymbekke kútpegen suraqtar da qoiyldy.
"Jeńis Mahmuduly, jaqynda "Jýsan" operatsiiasy ótken bolatyn. Operatsiia barysynda Siriiadaǵy qarýly qaqtyǵystarǵa qatysqan qazaqstandyqtar elge jetkizildi. Onyń árbir úshinshisi Sátpaev qalasynyń týmasy. Sátpaev – Qazaqstandaǵy "ýahabizm" dástúrli emes dini aǵymy damyp jatqan qalanyń biri. Ulttyq qaýipsizdik komitetiniń málimetine sáikes, Siriiada soǵysyp júrgen árbir besinshi qazaqstandyq Qaraǵandy oblysynyń turǵyny eken. Osy baǵytta qandai jumystar júrgizilip jatyr?", - dep surady jýrnalist.
Óńir basshysy suraqqa jaýap bererden buryn bul másele baspasóz máslihatynyń taqyrybyna sáikes kelmeitinin atap ótti.
"Búgingi brifingtiń taqyryby bul máselege sáikes kele me, kelmei me, bilmedim. Bul suraqqa qysqasha jaýap bereiin. Árine, mundai máseleler týyndaǵan. Eger 2-3 jyl nemese 5 jyl burynǵy jaǵdaimen salystyratyn bolsaq, dástúrli emes dini aǵymdardyń ókilderi birneshe esege azaidy. Siz "Jýsan" operatsiiasyna toqtaldyńyz. Ondaǵy málimetter týraly bilmedim", - dedi Jeńis Qasymbek aǵynan jarylyp.
Degenmen ol oblysta dástúrli emes dini aǵymdardyń ókilderimen belsendi túrde jumys júrgizilip jatqanyn aitty.
"Qaraǵandyda ondai adamdardy ońaltý jumystary belsendi túrde júrgizilip jatyr. Anyǵyn aitqanda solai. Árbir adam esepte tur, árbirimen jumys júrgizip jatyrmyz. Negizgi maqsatymyz – olardy áleýmettik ortaǵa beiimdeý, jumyspen qamtamasyz etý, olardyń balalaryna bilim berý. Anasymen birge kelgen balalardy aitamyn. Sátbaevta jáne basqa qalalarda bul baǵyttaǵy jumystar naqty, jeke adamdarmen júrgizilip jatyr", - dedi oblys ákimi.
Jeńis Qasymbek bul másele jeke baqylaýynda ekenin de aita ketti.
"Siz aitqan árbir úshinshi, árbir besinshi azamat degen aqparatyńyz jaily bilmedim. Meniń oiymsha, bizdiń oblysta bul másele boiynsha jaǵdai turaqty", - dep túiindedi sózin óńir basshysy.
Aita keteiik, Ulttyq qaýipsizdik komitetiniń málimetine sáikes, "Jýsan" operatsiiasy barysynda Siriiadan 595 qazaqstandyq qaitaryldy. Olardyń 400-den astamy balalar. Osyǵan deiin Qazaqstanǵa oralǵan on er adam men bes áiel túrli merzimge sottalǵan bolatyn. Olar Siriia aýmaǵyndaǵy terroristik uiymnyń qyzmetine qatysqany úshin kináli dep tanyldy.
