Jyl basynan beri elimizde 58 myńnan astam kólik tekserildi. Nátijesinde 2,5 myńnan astam túrli zań buzýshylyq anyqtaldy. Árbir 6-7-shi qyrǵyzstandyq avtokólik zań buzady. Bul týraly OKQ-de «Keden zańnamasyndaǵy zań buzýshylyq» degen taqyrypta ótken brifingte QR Investitsiialar jáne damý ministri Jeńis Qasymbek málimdedi, dep habarlaidy Baq.kz tilshisi.
«Qazirgi tańda Qazaqstan territoriiasynda sheteldik tasymaldaýshylarǵa qatysty baqylaý kúsheitildi. Nátijesinde ótken jeti kúnde 2721 kólik quraly tekserilip, 193 zań buzý deregi tirkeldi. Atap óterlik bir jait, bul zań buzýshylyqtardyń 60 paiyzdan astamy Qyrǵyzstannan shyqqan kólik quraldaryna tiesili. Jalpy jyl basynan beri 58 myńnan astam kólik quraldary tekserildi. Nátijesinde 2,5 myńnan astam túrli zań buzýshylyq anyqtaldy. Onyń 1 myńyn qyrǵyzstandyq kólik quraldary jasaǵan. Biz qazirgi tańda kólik qozǵalysyn táýlik boiy baqylap otyrmyz», - dedi Jeńis Qasymbek.
Ministr qyrǵyzstandyq árbir 6-7-shi kóliktiń elimizdiń shekarasynda zań buzýshylyq jasaitynyn aitty. Ótken aptada 835 qyrǵyzstandyq avtokólik tekserilipti.
«Nátijesinde 117 zań buzýshylyq anyqtaldy. Iaǵni jalpy árbir 6-7-shi qyrǵyzstandyq avtokólik Qazaqstan territoriiasyna zań buzyp keledi», - dedi Investitsiialar jáne damý ministri.
Onyń aitýynsha, júrgizýshilerdiń kóbinde tiisti qujattar bolmaidy eken.
«Tasymaldaýshylarda taýar men kólikke ruqsat beretin júk qujaty bolmaidy. Bul óte jii kezdesedi. 56 ret osy derek boiynsha zań buzylǵan. Taýar men kólikke ruqsat beretin júk qujatynyń bolmaýy júk tasymalynda kúdik týdyrady. Atalǵan derekter boiynsha tirkelgen materialdar Memlekettik kirister organdaryna jáne ekonomikalyq tergeý qyzmetterine beriledi. Olar tirkelgen zań buzýshylyqtar boiynsha odan ári jumys júrgizedi», - dedi ol.
QR Investitsiialar jáne damý ministri Jeńis Qasymbek Qyrǵyzstan men Qazaqstan shekarasynda da jii zań buzylatynyn aitty.
«Sonymen qatar kabotaj (shekara aýmaǵynda taýar men azamattardy tasymaldaý – avtor) derekteri kóptep tirkelýde. Ondai derekter Almaty-Qordai, Qordai-Sarybulak, Qordai-Masanchi marshrýttarynda jii kezdesedi. Bul naryqta bizdiń qazaqstandyq tasymaldaýshylar jumys isteýi qajet. Osylaisha, naryqta básekelestiktiń tiisti deńgeide damýyna jol berilmeýde», - dedi ministr.
Vedomstvo basshysynyń aitýynsha, qazirgi tańda elimizdegi shekaralarda artyq júk artqan kólik quraldary toqtatylýda. Jeńis Qasymbektiń sózine qaraǵanda, tasymaldaýshylar tiisti aiyppuldy tólep jatyr. Al tólei almaǵandarynyń kóligi aiyp turaǵyna qoiylyp jatyr eken.
