QR Premer-Ministriniń orynbasary Jeńis Qasymbek ortalyq jáne jergilikti atqarýshy organdardyń 2019 jylǵy sý tasqyny kezeńine daiyndyǵy máseleleri jóninde keńes ótkizdi, dep habarlaidy "Ult aqparat" primeminister.kz portalyna silteme jasap.
Keńes jumysyna ortalyq memlekettik jáne jergilikti atqarýshy organdardyń ókilderi qatysty.
Qazgidromettiń kóktemgi sý tasqyny boljamyna sáikes elimizdiń keibir óńirlerinde sý deńgeiiniń kóterilýi qaýipteri baiqalady.
QR Ishki ister ministrliginiń derekterine sáikes, sý tasqyny qaýipteri Qaraǵandy, Aqmola, Soltústik Qazaqstan, Batys Qazaqstan, Qostanai oblystarynda saqtalǵan.
«Sońǵy 2 aptada 675 km aryq pen arnany tazalaý jumystary júrgizildi. Eldi mekenderden 2 mln 160 myńnan astam tekshe metr qar shyǵaryldy. Almaty, Aqmola, Aqtóbe, Shyǵys Qazaqstan, Jambyl, Qaraǵandy, Qyzylorda, Pavlodar, Soltústik Qazaqstan jáne Túrkistan oblystarynyń avtokólik joldarynda 16 874 sý ótkizgish nysandar tazartyldy», — dedi QR IIM Tótenshe jaǵdailar komitetiniń tóraǵasy V. Bekker.
Onyń aitýynsha, Túrkistan, Jambyl, Qyzylorda, Almaty (jazyq bóligi), Mańǵystaý, Atyraý oblystarynda sý tasqyny qaýipiniń joǵary deńgeii belgilengen.
Órtten qutqarý bólimsheleri joǵary daiyndyq ústinde, ońtústik óńirlerden Aqmola, Soltústik Qazaqstan jáne Batys Qazaqstan oblystaryna jóneltýge josparlanǵan qutqarý otriadtarynyń kúshteri men quraldary esepteldi.
Jalpy, azamattyq qorǵaý organdarynyń barlyq bólimsheleri tolyq ázir.
Indýstriia jáne infraqurylymdyq damý vitse-ministri Q. Óskenbaev elimizde kún saiyn patrýldeý jumystary júrgizilip jatqanyn, 400-den astam qaýipti ýchaskeler baqylaýǵa alynǵanyn habarlady. 689 birlik barlyq qajetti tehnika bekitilgen.
Óz kezeginde aýyl sharýashylyǵy vitse-ministri E. Nysanbaev kúndelikti barlyq sý qoimalarynyń jaǵdaiy tekserilip turatynyn aitty. Búginde sý qoimalary tasqyn sýlardy qabyldaýǵa daiyn. Jalpy alǵanda, jaǵdai turaqty.
Energetika ministrliginiń málimetterinshe, Qazaqstan aýmaǵyn qar basý kólemi 7 naýryzdan 15 naýryz aralyǵynda 11% (66%-dan 55 %-ǵa deiin) tómendegen. 7 naýryzdan 14 naýryzǵa deiingi aralyqta Jambyl, Túrkistan, Qyzylorda, Mańǵystaý, Atyraý oblystarynda qar erip ketti. Qalǵan aýmaqtarda qar jabynyndaǵy ylǵal qorynyń kólemi orta eseppen 20-30%-ǵa, kei jerlerde 70%-ǵa deiin azaiǵan (Aqtóbe oblysy), BQO men Aqtóbe oblystarynda topyraqtyń qatý tereńdigi orta eseppen 15 sm-ge kemidi.
Óńirlerdegi aǵymdaǵy jaǵdai men qabyldanyp jatqan sharalar týraly onlain rejiminde Qaraǵandy, Aqmola, Soltústik Qazaqstan, Qostanai, Shyǵys Qazaqstan, Batys Qazaqstan oblystarynyń ákimderiniń orynbasarlary baiandady.
Keńes qorytyndysy boiynsha, J. Qasymbek salalyq memlekettik organdarǵa jáne jergilikti atqarýshy organdarǵa turaqty monitoring júrgizip, jaǵdaidy únemi baqylaýda ustap, sonymen qatar turǵyndar arasynda aqparattyq-túsindirý jumystaryn belsendi júrgizýdi tapsyrdy.
«Biz qar eń qatty eritin kezeńge keldik, bul sý tasqynynyń naǵyz qiyn kezeńi. Óńirlerde úlken jumystar atqarylyp jatyr, turǵyndardy habardar etý kerek, adamdar ózderiniń qaýipsizdigin qamtamasyz etý úshin qandai sharalar qabyldaý kerektigin bilýi tiis», — dedi J. Qasymbek.
Premer-Ministrdiń orynbasary sonymen qatar úkimettik toptyń sý tasqyny kezeńine ázirligin baqylaý úshin óńirlerge jumys saparlaryn bastaitynyn habarlady.
