Foto: J. Qasymbektiń Instagram paraqshasynan
Astana qalasynyń ákimi Jeńis Qasymbek Instagram paraqshasynda qaladaǵy jańadan ashylǵan kitaphanalar týraly aitty, dep habarlaidy "Ult Aqparat".
"Dostar! Ózderińiz biletindei, balalardy erte jastan kitap oqýǵa baýlýdyń mańyzy zor. Bul balanyń saýatyn arttyryp, sózdik qoryn kóbeitip qana qoimai, kókjiegin de keńeitýge áser etedi. Sońǵy birneshe jylda qalamyzda jańa kitaphanalar ashylǵan joq. «Ortalyqtandyrylǵan kitaphanalar júiesi» 18 kitaphanadan turatyn", -deidi ákim.
J. Qasymbek biyl 4 kitaphananyń ashylýy josparlanǵanyn, olardyń 2-eýi qazirdiń ózinde ashylyp qoiǵanyn aitty.
Olar myna mekenjailarda ornalasqan: buqaralyq kitaphana (Nájimedenov kóshesi, 27), balalar kitaphanasy – (Bókeihan kóshesi, 25v).
"Búgin balalarǵa arnalǵan jańa kitaphanaǵa bardym. Jalpy aýdany 340 sharshy metrdi quraityn kitaphana balalarǵa qyzmet kórsetýge arnalǵan. Degenmen eresekter de kitaphana qyzmetin paidalana alady. Bul kitaphananyń qory 3 myńǵa jýyq jańa kitaptan turady.Memleket basshysy kitap oqityn halyq qana naǵyz intellektýaldy bola alatynyn aita kele, «Biz jas urpaqtyń kitapqa qushtarlyǵyn oiatýymyz kerek» degen", -deidi ol.
Foto: J. Qasymbektiń Instagram paraqshasynan
Ákimniń sózinshe, jýyrda Astanada taǵy eki kitaphana ashylady. Osylaisha, qalanyń kitaphana jelisi 22 kitaphanadan turady, olardyń arasynda zaǵip jáne nashar kóretin azamattarǵa arnalǵan kitaphana da bar.
Sol siiaqty qoldanystaǵy kitaphanalardy jańǵyrtý jumystary da júredi eken.
"Ótken jyly 4 kitaphanany, biyl taǵy 4 kitaphanany jańarttyq. Qalalyq jeliniń kitap qory 800 myńǵa jýyq danany quraidy. Máselen, qazirgi ýaqytta kitaphana qoryna berilgen kitaptar sany ótken jylmen salystyrǵanda 30%-ǵa artty, bul oqyrmandardyń ósýine de aitarlyqtai áser etti.Kitaphanalar – bilim ortalyǵy ǵana emes ári demalys orny!"-dep otyr Astana ákimi.
