Kólik alýǵa jeńildetilgen paiyzben nesie berý baǵdarlamasy aiasynda bankter 75 mlrd teńge somasyndaǵy ótinimderdi maquldady. Bul týraly Indýstriia jáne infraqurylymdyq damý ministri Qaiyrbek Óskenbaev aitty, dep habarlaidy QazAqparat.
Májilistegi parlamenttik tyńdaýdan keiin tilshiler ministrden atalǵan baǵdarlama boiynsha nesie bólý ne sebepti tejelip qalǵanyn surady.
«Baǵdarlama toqtap turǵan joq. Jalpy 100 mlrd teńge bólinip, sonyń 75 mlrd teńgesine ótinimder maquldandy. Endi taǵy 25 mlrd teńgesi qaldy. Bastapqy kúnderdegi qarqynmen birden 20-30 myń ótinimdi qabyldai almaidy. Óitkeni baǵdarlama aiasynda tek 25 mlrd teńge qaldy. Osy oraida erteń turǵyndar «nege ótinimderdi qabyldamadyńdar» dep narazylyqtaryn aitýy múmkin», - dedi Q.Óskenbaev.
Sonymen qatar ministrge baǵdarlamaǵa boiynsha avtokólik qanshalyqty jetkilikti bolatyny týraly suraq qoiyldy.
«100 mlrd teńgege nesiege shamamen birden 15-16 myń avtokólik alýǵa bolady. Qazirgi kezde 10 myń kólikke eseptelgen ótinimdi bankter maquldady», - dedi ministr.
Budan buryn habarlanǵandai, Óskenbaev atalǵan baǵdarlama aiasyndaǵy jumystar bir jylmen shektelmeitinin atap ótti. Osy baǵdarlamany júzege asyrý barasynda qarajat revolverlik tetik arqyly bólindi.
Osy ýaqytqa deiin kólik alǵan adamdar nesiesin tólei bastaǵannan keiin, bul qarajat taǵy da ainalymǵa túsedi.
