Qus jeminiń qymbattaýyna bailanysty qus ósirýshiler qiyndyqqa tap bolyp otyr. Bul týraly IH halyqaralyq qus ósirýshiler forýmynda Qazaqstan qus ósirýshileri odaǵynyń prezidenti Rýslan Sháripov aitty, dep habarlaidy QazAqparat agenttigi.
«Qazirgi kezde qusqa arnalǵan jem boiynsha problema baiqalyp otyr. Osy oraida Reseide, Belarýs, Armeniia jáne Qyrǵyzstanda da bizdegi siiaqty másele bar. Qus jeminiń bir tonnasy 180-190 myń teńgege jetti. Qus eti men jumyrtqanyń ózindik qunynda 70 paiyzy jemniń baǵasyna qatysty bolady. Eger qus jemi arzan bolsa, onda bizdiń ónim de naryqqa tómen baǵamen shyǵady», - dedi Sháripov IH halyqaralyq qus ósirýshiler forýmynda tilshiler saýalyna jaýap bere otyryp.
Onyń aitýynsha, bul salada jabdyqtardyń barlyǵy elimizge shetelden tasymaldanady.
«Keńestik kezeńde bizde qus sharýashylyǵyna qatysty barlyǵy boldy. Qustardyń túrli tuqymdary keńinen taralǵan edi jáne olardy bizden satyp alatyn. Keiinen osynyń barlyǵyn joǵaltyp aldyq. Qazir syrttan tasymaldaǵandyqtan, valiýtanyń joǵary quny óz áserin tigizip otyr. Al Resei men Belarýs ónimderdi ózderi óndirip jatyr. Olar quraldar men jabdyqtardy ózderi qamtamasyz etkennen keiin, baǵa boiynsha bul eldermen básekelesý qiynǵa túsip otyr», - dedi Qazaqstan qus ósirýshileri odaǵynyń prezidenti.
