Astanalyqtardyń 30%-dan astamy qala ishinde avtobýspen qatynaidy eken. Sol 30% turǵynnyń qatarynda biz de barmyz. Kúndelikti jumysqa baryp-qaitatyn 1 saǵatqa jýyq ýaqytymyz avtobýsta ótedi.
Basqa qalany qaidam Astananyń avtobýstarynyń sapasyna syn aita almaimyz. Kólikter jańa, qysta jyly, jazda salqyn. Qala kóshelerinde avtobýstarǵa arnaiy jolaq syzylǵaly kei jerge taksiden tez jetetin boldyq.
Aq pen qara qatar júretin bul jalǵannyń qatal zańyna sáikes qoǵamdyq kóliktegilerdiń, iaǵni, júrgizýshi men kondýktordyń da kei kezderi zańdy belshesinen basyp, jolaýshylardyń quqyǵyn aiaqqa taptap jatatyn kezderi joq emes. Onyń bir mysaly - bilet bermei jol aqysyn jinap alý. Barlyǵy bolmasa da keibireýi 90 teńgeńdi alyp, ary qarai jónine júre beredi. Quddy bir bilet berý mindetine kirmeitindei, miz baqpaidy. Bilet nege bermeisiń deseń, «osy bir japyraq qaǵazdy ne qylaiyn dep ediń?!» deitinderi de bar. «Bul tildei bilet tamyzdyqqa da jaramaidy. Avtobýstan túse sala qoqys jáshigine tastaimyz. Biraq ol qaǵazdyń da suraýy bar ǵoi. Kúni boiy avtobýsqa mingen jolaýshy ataýlydan alǵan aqshańnyń esebin sol jyrtylǵan bilettiń sanynan shyǵarmaisyń ba?» dep urysqyń keledi, álgi kondýktorge. Amal ne, ol biledi, kondýktor bolmai turyp-aq bilgen. Dei turǵanmen tekseris joqta 3-4 myń teńge «levyi» jasap alýǵa talpynady. Ol qaraǵymdar tekserý kelip qalsa aiyp tóleitinderin de biledi. Biraq adamnan aila artylǵan ba. Sońǵy aialdamaǵa jaqyndaǵanda, tekserýshiler júrmeidi-aý degen aýdandarda bilet bermeý operatsiiasyn júzege asyrady.
Kópshiligimiz bilet bermese qoisyn, barar jerime aman jetsem boldy deimiz. Sonymyz beker. Bir adam, on adam bilet suramaidy, sáikesinshe aqsha zańdy iesine jetpei joq bolady. Milliondaǵan qarjyny jep jatqandar týraly estigende aýzymyz ashylyp tańqalǵannan basqa qylar qairanymyz joq. Qolynan kelgende qonyshynan basyp, túieni túgimen jutatyn klandarmen kúreste kúshimiz álsiz bolýy múmkin, biraq qoldan keletin jerde qareket qylýymyz kerek. Aldymen bilet alyńyz, aqshańyzdy artynan beresiz. «Basynan shiritin balyqty quiryǵynan bastap tazalaidy».
Dosjan Ysqaq
