Jemqorlyq memlekettiń damýyna kedergi bolǵandyqtan úlken kúná bolyp sanalady. Bul týraly Qazaqstan musylmandary dini basqarmasynyń tóraǵasy, Bas múfti Naýryzbai qajy Taǵanuly aitty, dep habarlaidy QazAqparat.
«Qurannyń Máida súresiniń 42-aiatynda Alla Taǵala: «Olar - ótirikke qulaq salýshy, aram jeýshiler. Paiǵambarymyz Muhammed (s.ǵ.s.), eger olar saǵan kelse aralaryna úkim ber nemese olardan júz bur. Eger olardan júz bursań saǵan eshbir ziian keltire almaidy. Al eger aralaryna úkim berseń, týra úkim ber. Sheksiz Alla týrashyldardy súiedi» degen. Bul aiatty tápsirshi ǵalymdar aram jeýshiler degendi ózgeniń mal-múlkin iemdený, aqysyn jeý dep túsindirgen. Iaǵni, adamdar óziniń mansabyn, basqa da basymdyqtaryn paidalanyp, ózgeniń mal-dúniesin naqaqtan, aram jolmen alýy kúná ekendigin joǵarydaǵy aiat siz ben bizge aityp otyr. Al endi paiǵambarymyzdyń hadisine keler bolsaq, «laýazymdy qyzmettegi tulǵaǵa berilgen syilyq aram jolmen kelgen jalaqy» degen sóz bar. Iaǵni bireýdiń laýazymyn paidalanyp, soǵan syilyq berip, óz maqsatyna jetkizgisi keletin adam jáne sol laýazymyn paidalanyp, adamdardan aram jolmen para alǵan adamnyń jaǵdaiyn paiǵambarymyz osylai sipattap bergen» - dedi QMDB tóraǵasy QR Sybailas jemqorlyqqa qarsy is-qimyl agenttigi alańynda ótken brifing barysynda.
Sondyqtan Bas múfti jemqorlyq úlken kúnániń qataryna jatatyndyǵyn basa aitady.
«Jemqorlyq tek bir adamǵa ǵana emes jalpy halyqqa ziianyn tigizedi. Óitkeni, jemqorlyq memlekettiń, eldiń damýyna kedergi bolady. Sol sebepti bul úlken kúná bolyp sanalady. Joǵarydaǵy aiattarda da Alla taǵala aram jolmen dúnie tappaý kerektigin eskertedi. Qazirgi tańda kóp adam «bul dúniede qutylyp ketemin, bári umytylady» dep oilaityn shyǵar. Biraq, bu dúniede qutylǵanmen eki iyqta 2 perishte turǵanyn, barlyq amaldy jazyp otyrǵanyn esimizden shyǵarmaýyz kerek. Sonda, inshalla, mundai kúnáǵa barmai aman bolamyz», - dedi Naýryzbai qajy Taǵanuly.
