2020 jyldyń 1-toqsanynda sybailas jemqorlyǵy úshin 417 laýazymdy tulǵa jaýapqa tartyldy. Bul týraly QR Sybailas jemqorlyqqa qarsy is-qimyl agenttigi Strategiia jáne jedel basqarý departamentiniń basshysy Nurlan Jaqsymbetov aitty, dep habarlaidy QazAqparat.
«Agenttiktiń shyǵyndy qalpyna keltirý jumystaryn da erekshe atap ótken oryndy. 1-toqsannyń qorytyndysynda biz anyqtalǵan shyǵynnyń 97 paiyzyn nemese 21,7 mlrd teńgeni ótettik. Bul ótken jyldyń kórsetkishinen 7 ese kóp», - dedi Nurlan Jaqsymbetov.
Onyń atap ótýinshe, jemqorlyq úshin jazaǵa tartylǵan tulǵalar sany 9 paiyzǵa artty. Olardyń árbir tórtinshisi memlekettik organdardyń jáne kvazimemlekettik uiymdardyń birinshi basshylary bolyp otyr.
«Tolyqtai alǵanda, qylmystyq jaýapkershilikke 417 tulǵa, onyń ishinde respýblikalyq deńgeidegi - 11, oblystyq deńgeidegi -37, qalalyq jáne aýdandyq deńgeidegi 35 basshy tartyldy», - dedi departament basshysy.
Nurlan Jaqsymbetovtiń dereginshe, ortalyq memlekettik organdar arasynda jemqorlyq qylmysy úshin jazaǵa tartylǵandardyń 57 paiyzy - Ishki ister ministrliginiń qyzmetkerleri. Munan bólek, Ekologiia, Aýyl sharýashylyǵy, Qarjy, Indýstriia ministrlikteriniń de birneshe qyzmetkeri jemqorlyq qylmysy úshin ustalǵan. Al jergilikti atqarýshy organdar arasynda osy jyldyń 1-toqsanynda ShQO, Jambyl, Qyzylorda, Túrkistan, Qostanai jáne Pavlodar oblystary ákimdikterinde jemqorlar kóp ustalǵany belgili bolyp otyr.
